Навука – гэта крута! 28 доказаў ад школьнікаў. Раённы конкурс даследчых работ амаль 20 гадоў з’яўляецца пляцоўкай для раскрыцця здольнасцяў школьнікаў Ляхавіччыны

●Раённы конкурс даследчых работ амаль 20 гадоў з’яўляецца пляцоўкай для раскрыцця здольнасцяў школьнікаў Ляхавіччыны

Што агульнага паміж лексічнымі і сінтаксічнымі сродкамі выразнасці ў загалоўках раёнкі, лёсамі ваенных лётчыкаў, якія загінулі пры выкананні баявога задання на тэрыторыі Ляхавіцкага раёна ў чэрвені 1941 года, якасцю вады ў рацэ Ведзьме і ўплывам інтэрнэт-слэнгу на мову падлеткаў? Усё гэта і многае іншае – тэмы даследаванняў ляхавіцкіх старшакласнікаў, прадстаўленых на навукова-практычнай канферэнцыі «З навукай у будучыню».

На мінулым тыдні СШ № 1 зноў ператварылася ў сапраўдны навуковы цэнтр, дзе сабраліся 9–11-класнікі школ раёна, якія прадставілі на суд журы 28 даследчых работ у 14 секцыях. Удзельнікі прадэманстравалі не толькі глыбокія тэматычныя веды і цікавасць да гісторыі роднага краю, але і імкненне да вырашэння актуальных праблем.
Па выніках раённага конкурсу дыпломамі I, II, III ступеняў адзначаны 11 навучэнцаў, 17 – падзякамі. Чатыры дыпломы заваявалі юныя навукоўцы з СШ № 1, у якіх дыплом I ступені і тры дыпломы II ступені. У гімназіі – тры дыпломы (два – II ступені і адзін – III ступені),
у СШ № 2 – два (II і III ступеняў), два дыпломы — II  і III ступеняў  у Тухавіцкай СШ.

Інтарэс навучэнцаў рознабаковы. Дыпломам I ступені адзначана дзевяцікласніца СШ № 1 Ксенія Каролік за даследаванне ўплыву рэгулятараў росту на захаванасць буракоў сталовых, выкананае
пад кіраўніцтвам настаўніцы біялогіі Ліліі Маслоўскай. На аснове атрыманых даных яны пераканаліся, што карысны караняплод можна захаваць у дамашніх умовах на працяглы тэрмін з выкарыстаннем падручных сродкаў, такіх як пясок, пілавінне, гліна і іншыя, а таксама ў поліэтыленавых пакетах. А выкарыстанне рэгулятараў росту дапамагае палепшыць ураджайнасць буракоў, павысіць устойлівасць да захворванняў і спрыяе захаванасці.
У секцыі «Гісторыя – культурная спадчына і сучаснасць» адзінаццацікласніца СШ № 1 Дар’я Скрыпнік прэзентавала даследаванне брацкай магілы на плошчы Перамогі ў Ляхавічах. Як падкрэсліла старшакласніца, вывучэнне брацкіх пахаванняў дазваляе не толькі аднавіць імёны загінулых, але і зразумець маштаб траге-
дыі і веліч подзвігу савецкага народа. А практычнае значэнне даследавання ва ўдакладненні і дапаўненні спіса загінулых, змешчаным у кнізе «Памяць. Ляхавіцкі раён», стварэнні
Каталога «Брацкая магіла савецкіх воінаў і партызан. Воінскае пахаванне № 98 на плошчы Перамогі ў Ляхавічах». Наш райцэнтр знаходзіўся пад нямецка-фашысцкай акупацыяй з 26 чэрвеня 1941 года па 6 ліпеня 1944 года і быў вызвалены падчас Беларускай
наступальнай аперацыі «Баграціён» фарміраваннямі 1-га Беларускага фронту, якія вялі наступленне ў напрамку Бабруйск –
Слуцк – Баранавічы – Брэст. Памяць пра герояў Вялікай Айчыннай вайны ўвекавечана ў назвах вуліц. Пра іх памятае падрастаючае
пакаленне!
Перапахаванне з усіх брацкіх і адзіночных пахаванняў часоў Вялікай Айчыннай вайны на тэрыторыі горада і бліжэйшых вёсак у брацкую магілу ў Ляхавічах адбылося ў красавіку 1953 года, а ў 1955 годзе
была ўстаноўлена скульптура ў выглядзе двух воінаў. Сёння ў брацкай магіле пахаваны 268 воінаў і партызан, якія загінулі ў баях за горад Ляхавічы.
– Навукова-практычная канферэнцыя «З навукай у будучыню» застаецца важным інструментам выяўлення і падтрымкі адоранай моладзі, спрыяючы рознабаковаму развіццю падрастаючага пакалення і ўмацаванню цікавасці да разнастайных з’яў і падзей. Канферэнцыя праводзіцца з 2008 года, і за 18 гадоў стала сапраўднай кузняй маладых талентаў, на прафесійнае вызначэнне якіх уплывае менавіта даследчая дзейнасць, – адзначыла начальнік аддзела па адукацыі райвыканкама Марыя Саракавік.

Наталля ПЕРАПЕЧКА.
Фота Сяргея ВАРАНОВІЧА.