«Водар» – асалода для душы. Народны ансамбль народных інструментаў «Водар» настаўнікаў Ляхавіцкай дзіцячай школы мастацтваў адзначыў 30-годдзе з дня прысваення звання «народны»
На якой бы канцэртнай пляцоўцы ні выступаў народны ансамбль народных інструментаў «Водар» настаўнікаў Ляхавіцкай дзіцячай школы мастацтваў, заўжды пануе незабыўная атмасфера творчасці, натхнення, музычнай гармоніі і радасці.
Вось і ўвечары ў мінулы чацвер у ГДК было хвалююча прыгожа, душэўна меладычна, па-сапраўднаму святочна. Разам са шматлікімі прыхільнікамі свайго таленту, калегамі – работнікамі ўстаноў культуры Ляхавіцкага і Баранавіцкага раёнаў «Водар» шыкоўна адзначыў 30-годдзе з дня прысваення звання «народны».
Краналі душу цудоўныя мелодыі ў выкананні таленавітых удзельнікаў музычнага калектыву. Беларускія народныя і аўтарскія мелодыі, ваенная тэматыка, зарубежныя і айчынныя хіты ў выкананні «Водару» нікога не пакінулі абыякавымі.
З 2012 года мастацкім кіраўніком і дырыжорам «Водару» з’яўляецца таленавіты музыкант Ларыса Муралава. Галоўнай адметнасцю рэпертуара ансамбля з’яўляюцца яскравыя інтэрпрэтацыі музыч-ных твораў, створаныя ў выніку сумеснай творчай работы ўдзельні-каў ансамбля. «Водар» актыўна ўдзельнічае ў культурным жыцці Ляхавіччыны, з’яўляецца пераможцам шматлікіх абласных, рэспубліканскіх і міжнародных творчых конкурсаў і фестываляў.
Гучала шмат цёплых і шчырых слоў у адрас калектыву-юбіляра.
З павагай і прызнаннем за творчасць гаварыў пра ўдзельнікаў «Водару» намеснік старшыні райвыканкама Алег Траццяк. Шыкоўныя падарункі калегам – музычныя сольныя выступленні ў суправаджэнні ансамбля падрыхтавалі Марына Галушка, Марыя Камінская, Людміла Ламака, Мікалай Шклянік, народная арт-група «ВІНС-акорд».
– Усе мы, каму пашчасціла стаць удзельнікамі гэтага музычнага свята, знаходзіліся пад уражаннем ад пачутага і ўбачанага. Ганарымся такімі калегамі і радуемся іх поспеху. Дзякуй, «Водар», за такі выдатны музычны падарунак. Няхай і далей творчасць і поспех спадарожнічаюць ансамблю, – адзначае дырэктар Ляхавіцкай ДШМ Марына Галушка.
Галіна КАНЬКО.
Фота Сяргея ВАРАНОВІЧА.
