У кадры – маладыя журналісты
Падчас экскурсіі па зімовым садзе ўніверсітэта
На мінулым тыдні ў Брэсцкім дзяржаўным універсітэце імя А. С. Пушкіна прайшоў абласны вучэбна-метадычны семінар, на якім абмяркоўваліся пытанні падрыхтоўкі журналісцкіх кадраў і павышэння прафесійнага майстэрства. На сустрэчы прадстаўнікоў СМІ з выкладчыкамі кафедры журналістыкі філфака размова ішла пра напрамкі супрацоўніцтва галоўнага ўпраўлення ідэалагічнай работы, культуры і па справах моладзі аблвыканкама, філалагічнага факультэта БрДУ і рэдакцый.
Чатыры з паловай месяцы назад выпускнікі аддзялення ўліліся ў рады газетчыкаў Брэстчыны. Сярод удзельнікаў сустрэчы былі і тыя, хто зусім нядаўна сядзеў за сталамі ў тутэйшых аўдыторыях у якасці студэнтаў. Яны падзяліліся ўражаннямі пра першыя крокі ў прафесіі. Начальнік аддзела па рабоце са СМІ галоўнага ўпраўлення ідэалагічнай работы, культуры і па справах моладзі аблвыканкама Вадзім Ляўковіч пазнаёміў з вынікамі анкетавання маладых спецыялістаў, што працуюць у рэдакцыях.
Падчас сустрэчы гаварылася пра падрыхтоўку кадраў для газет яшчэ са школы, пра адпаведную прафарыентацыйную работу. Дні адкрытых дзвярэй, конкурсы юнкараў – усё гэта для таго, каб школьнікі мелі дакладнае ўяўленне пра работу журналіста. Размова ішла і пра надзвычай важнае для прафесійнага ўдасканалення ўменне маладых спецыялістаў бачыць цікавыя тэмы, пра адносіны да слова і яго выкарыстанне.
Выдатнай школай для пачынаючых карэспандэнтаў з’яўляецца настаўніцтва. Плануецца на базе абласной арганізацыі БСЖ стварэнне клуба маладых журналістаў. Тым больш першы крок да яго ўжо зроблены: нядаўна ў Пружанах прайшоў абласны семінар для супрацоўнікаў рэдакцый, якія асвятляюць маладзёжную тэматыку.
Прыемным сюрпрызам для газетчыкаў стала экскурсія па зімовым садзе ўстановы.
Дадам, што па накіраванні ці з рэкамендацыямі ”Ляхавіцкага весніка” і ў Брэсцкім універсітэце, і ў інстытуце журналістыкі БДУ вучацца некалькі нашых землякоў.
Наталля ПЕРАПЕЧКА.
