Дарога даўжынёй у паўстагоддзя. У нядзелю сваё прафесійнае свята адзначаць дарожнікі і аўтамабілісты /фота/
Для работнікаў гэтай арганізацыі дарогі сталі неад’емнай часткай жыцця. І яны па іх не толькі перамяшчаюцца. Тыя, хто працуе ў філіяле Брэстаблдарбуда “Ляхавіцкае ДРБУ-200”, дарогі плануюць, будуюць, рамантуюць, утрымліваюць у парадку. І менавіта ад прафесіяналізму дарожнікаў у многім залежыць, наколькі бяспечнымі і камфортнымі будуць нашы паездкі і прагулкі,
А пачыналася ўсё паўвека назад. 1 лістапада 1966 года ў нашым райцэнтры было створана дарожна-рамонтнае будаўнічае ўпраўленне № 200, якое ўзначаліў Уладзімір Куцень. 10 работнікаў – увесь штат новай арганізацыі. Адным з першых аформлены загад пра прыняцце на работу трактарыстам Міхаіла Піліногі. З таго часу і да 2007 года, калі выйшаў на пенсію, Міхаіл Іванавіч у сваёй працоўнай кніжцы меў толькі адзін запіс: механізатар ДРБУ-200. Зараз ён на заслужаным адпачынку, а сямейную дарожную дынастыю дастойна прадаўжаюць яго сын – цяперашні начальнік арганізацыі Ігар Пілінога, пляменнікі – вадзіцелі Юрый і Андрэй Піліногі.
Рабочым пачынаў свой працоўны шлях у толькі створаным упраўленні Іван Коктыш, які потым доўгі час працаваў тут токарам. Разам са станаўленнем дарожнага ўпраўлення першыя крокі ў прафесіі рабіў і колішні галоўны інжынер Алі-Рашыд Байрашэўскі. Ветэраны ДРБУ-200 і сённяшнія работнікі з пашанай успамінаюць Івана Касміна, які быў на чале арганізацыі 25 гадоў. Яго, на жаль, ужо няма сярод жывых, але тут працуе інжынерам яго зяць. Дзесяцігоддзе ўзначальвала дружны і зладжаны калектыў Алена Лойка. І сёння яна – чаканы госць і добры дарадца калегам. Алену Іванаўну і іншых ветэранаў-дарожнікаў запрасілі на свята-ўшанаванне, прысвечанае паўвекавому юбілею арганізацыі.
За дзесяцігоддзі плённай працы ляхавіцкія дарожнікі пакінулі пасля сябе нямала добрых напамінаў. Сярод важных аб’ектаў у біяграфіі іх службы, напрыклад, аўтадарогі Ляхавічы-Крывошын-Свяціца, Ляхавічы-Сваятычы, Дарава-Навасёлкі, Краглі-Падлессе і многія іншыя. Акрамя сваёй асноўнай работы, паспявалі дапамагаць наводзіць прыгажосць у горадзе і аграгарадках, на вытворчых тэрыторыях прадпрыемстваў: добраўпарадкавалі дарожкі ў скверы райцэнтра, тэрыторыю льнозавода, зернесушыльных комплексаў, вясковыя і аграгарадскія вуліцы. Плённа працавалі не толькі па адрасах свайго раёна, але і за яго межамі. Напрыклад, удзельнічалі ў будаўніцтве ўчастка аўтадарогі “абход тэрыторыі Нацыянальнага парку “Белавежская пушча”.
Ёсць у арганізацыі свой завод па выпуску дарожнага борта і тратуарнай пліткі (узначальвае майстар Ларыса Прыхач). Яго прадукцыя выкарыстоўваецца не толькі для ўласных патрэб дарожнай службы, запатрабаваная і сярод насельніцтва, яе з ахвотай закупляе і Клецкае ДРБУ: задавальняюць якасць і кошт.
Яркія дарожныя знакі – нязменныя спадарожнікі ўсіх аўтамабільных шляхоў. Іх абнаўленнем і рэстаўрацыяй займаецца мастак-афарміцель Алена Магала. Яна гэтай справе аддала больш за 20 гадоў.
– Прафесійна выконваюць абавязкі спецыялісты інжынерна-тэхнічнай службы. Асноўныя дарадчыкі і памочнікі, ініцыятары новых ідэй – галоўны інжынер Валерый Зубік, галоўны механік Генадзій Барыскін, – расказвае пра калег Ігар Пілінога. – Кампетэнтнасць, уважлівасць і дакладнасць – вызначальныя якасці нашага галоўнага бухгалтара Таццяны Азімка, якая працуе ў ДРБУ амаль 3 дзесяцігоддзі.
Канешне, немагчыма ўявіць дарожную службу без галоўных дзеючых асоб, тых, хто працуе на іх будаўніцтве і добраўпарадкаванні. На парадку дня – завяршэнне бягучага рамонту аўтадарогі Дарава-Навасёлкі. Гэтым аб’ектам займаецца брыгада майстра Максіма Мухі. Максім у ДРБУ-200 працуе першы год па размеркаванні пасля заканчэння Брэсцкага дзяржаўнага тэхнічнага ўніверсітэта.
Дарэчы, 4 мільярды недэнамінаваных рублёў выдаткаваны на вышэйзгаданы рамонт са сродкаў так званага транспартнага падатку, выплачанага ўладальнікамі аўтамабіляў. Яшчэ 3,9 мільярда недэнамінаваных рублёў з абласнога бюджэту пайшлі на рамонт і ўтрыманне дарогі Заполле-Гута-Кулікі. Сёлета пакладзена 600 метраў асфальту на вуліцы Будзённага ў Галаўнінцах, 350 метраў – на Лугавой у Літве.
Свой аўтограф дарожнікі пакінулі і ў час падрыхтоўкі ўстаноў адукацыі да 2016/2017 навучальнага года: добраўпарадкавалі тэрыторыю, уладкоўвалі пешаходныя дарожкі ў Начаўскай, Тальмінавіцкай СШ, Задворскім, Крывошынскім, Тальмінавіцкім дзіцячых садках. Зараз сіламі ДРБУ-200 асфальтуецца вуліца Піянерская ў райцэнтры.
Дарожныя рабочыя добра ведаюць сваю справу. Раўняюцца яны на вопытных Леаніда Вялічку, Івана Рокача і на маладога Сяргея Варвашэвіча. Яны не падвядуць!
У штаце ўпраўлення нямала выдатных вадзіцеляў. Упэўнена адчуваюць сябе за рулём магутных МАЗаў Валерый Кабяльчук, Віктар Скрыцкі, Уладзімір Казакевіч, Анатолій Жагунь, Аляксандр Шыбкоўскі, які кіруе супер-машынай “СТИМ-5000”. На грэйдарах і пагрузчыках таксама профі – Андрэй і Юрый Піліногі, Мікалай Кулік, Аляксей Смаршчок, вадзіцель асфальтаўкладчыка Канстанцін Засухін – майстар сваёй справы.
Не за гарамі зіма, якая прынясе дарожнікам дадатковыя клопаты. Па словах начальніка, арганізацыя поўнасцю гатова да работы ў зімовы перыяд. “Перапынку ў руху аўтатранспарту па дарогах мясцовага значэння, нягледзячы на снегапады і галалёд, не адзначаецца”, – менавіта так найчасцей каменціруюць сітуацыю ў ДРБУ-200, калі непагадзь уступае ў свае правы. А за гэтымі лаканічнымі радкамі – скаардынаваная работа ўсіх падраздзяленняў, пастаянная гатоўнасць і рэгулярнае абнаўленне аўтапарка, забяспечанасць ГЗМ, спрактыкаваная каманда работнікаў, дакладна пастаўленыя задачы.
Наперадзе ў ДРБУ-200 яшчэ адзін важны, пакуль тэарэтычны аб’ект – стварэнне дарожнай карты. Маецца на ўвазе не схемы раённых шляхоў.
– Дарожная карта для нашай арганізацыі – гэта перспектыўнае планаванне рэканструкцыі і мадэрнізацыі ўсёй гаспадаркі, у тым ліку яе вытворчай базы, з прымяненнем новых тэхналогій, – тлумачыць Ігар Пілінога.
У нядзелю дарожнікі ўсёй краіны будуць адзначаць прафесійнае свята, а ляхавіцкія – яшчэ і юбілей сваёй арганізацыі. А ўжо ў панядзелак, як звычайна ў 7.30, для іх пачнецца чарговы працоўны дзень. Каб нашы дарогі былі шчаслівымі.
Галіна КАНЬКО.
Фота Сяргея ВАРАНОВІЧА.