Мірная лыжня
На базе лыжаролернай трасы ў аграгарадку Мір Баранавіцкага раёна ў спартыўным паядынку сышліся прадстаўнікі лясгасаў Брэстчыны. На старт галіновай спартакіяды выйшлі 14 каманд. Ляхавіцкі лясгас прадстаўлялі намеснік дырэктара па ідэалагічнай рабоце Наталля Адаменка, памочнікі ляснічага Ляхавіцкага і Мядзведзіцкага лясніцтваў Павел Шпак і Віктар Сердзюкоў.
Наталля Адаменка дзеліцца:
– Настрой быў бадзёры і баявы. Вакол такая прыгажосць! Бегчы па незнаёмай трасе было цікава і захапляльна. Працягласць лыжні для жанчын – 2 кіламетры, для мужчын – удвая большая.
Вынік ляхавіцкіх лесаводаў па суме балаў – трэцяе агульнакаманднае месца.
Да слова, умеюць змагацца лясгасаўцы – умеюць і адпачываць. Днямі арганізавалі сямейны выезд у Букавель – гарналыжны курорт у Карпатах. Каб паездка адбылася, пастараўся галіновы прафсаюз – аплаціў частку падарожжа. Пазнаёміліся з мясцовай культурай, пакаталіся на лыжах, сноўцюбах, “букавельскіх горках”, купаліся ў тэрмальных басейнах пад адкрытым небам – зарадзіліся морам эмоцый і ўражанняў. Пасля такога здаровага адпачынку і працаваць лягчэй.
Наталля ПЕРАПЕЧКА.
Фота з сайта Ляхавіцкага лясгаса.