Эліксір з канвеера
З 14 сакавіка галоўны прадукт на канвееры Ляхавіцкага кансервавага завода – бярозавы сок. Яго перапрацавана ўжо больш за 400 тон.
Як расказаў выконваючы абавязкі дырэктара прадпрыемства Юрый Рогаўцаў, за традыцыйна кароткі – каля двух тыдняў – сезон бярозавіку на заводзе плануецца закруціць у банкі каля 800 тон гаючага соку, пастаўленага Ляхавіцкім лясгасам.
Акрамя ўласна бярозавіку, гатуюцца запатрабаваныя ў пакупнікоў купажы кансерваванага напітку (іх на прадпрыемстве распрацавана каля 10 відаў). Частка соку новага ”ўраджаю” ўжо адправілася ў гандлёвыя кропкі краіны, а таксама ўстановы адукацыі, аховы здароўя, вайсковыя часці.
Дарэчы, з сокам, які прайшоў папярэднюю апрацоўку, завадчане будуць выпускаць розную кансерваваную прадукцыю на працягу года.
Галіна КАНЬКО.
Фота Сяргея ВАРАНОВІЧА.