Прыгожае шоу /фота new/

Падчас іспыту “Візітоўка” ўдзельніцы  расказвалі пра сябе, для  чаго многія выкарыстоўвалі відэаролікі.  Што ж даведаліся гледачы? У Вольгі Карпік шмат сяброў, якія часта прыходзяць у госці, таму яна  любіць кулінарыць і… марыць стаць магістрам юрыдычных навук. Вольга Пішч – натура творчая, галоўная выканаўца шматлікіх роляў – дачка, мама, жонка, памочніца. Самай важнай падзеяй у сваім жыцці выпускніца ўніверсітэта культуры лічыць нараджэнне дачушкі, якая  разам з татам прыйшла падтрымаць маму.

Кола захапленняў Вольгі Сакун вельмі шырокае: навука, спорт, паэзія. А яшчэ  яна любіць марыць  і будаваць планы на будучыню.  Насця Шчэрба – нераўнадушная асоба і актывістка, з дзяцінства лячыла коцікаў,сабачак, птушак, паўдзельнічала  ў  рэспубліканскім конкурсе “Студэнцкая вясна”, каледжскім велапрабегу і конкурсе аўтарскай песні,   была ўладальніцай прыза глядацкіх сімпатый у свяце “Міс каляджанка”.

Цікава прайшлі і этапы “Мая прафесія – мой выбар”( удзельніцы крэатыўна  прадставілі  сваю прафесію), “Бітва талентаў” (дзяўчаты чыталі вершы, спявалі,танцавалі, дэманстравалі кулінарнае майстэрства). Захапіла ўсіх і дэфіле ў вячэрніх сукенках.

Свой выбар зрабілі і балельшчыкі: прыз глядацкіх сімпатый дастаўся Вользе Пішч.  Журы доўга спрачалася наконт таго, хто стане пераможцай, бо ўсе ўдзельніцы дастойныя. І ўсё ж на гэты раз удача паспрыяла  Вользе Сакун, якая і атрымала галоўны тытул “Ляхавічанка-2017”. Без кветак, падарункаў ад спонсараў не засталася ні адна ўдзельніца. А добры настрой стваралі маладыя  ўдзельнікі мастацкай самадзейнасці раёна.