Вучоба. І не толькі…
Выпускнікі ЛДАКа паспяхова працуюць у сельгасарганізацыях, займаюцца навуковай работай, узначальваюць прадпрыемствы, установы, арганізацыі, фермерскія гаспадаркі, працуюць у дзяржаўных органах кіравання. Нездарма гэту навучальную ўстанову ведаюць не толькі на Брэстчыне, але і ў Беларусі, нават за яе межамі.
Вучэбная гаспадарка, калекцыйна-вопытнае поле, сад з пладовым гадавальнікам, цяпліца, вытворчыя майстэрні і фермы, ветэрынарная клініка, пчальнік, аўтатрактарадром, вучэбны палігон, студэнцкія інтэрнаты, спартыўныя, актавая і танцавальная залы, сталоўка — багатая база не толькі для спасціжэння тэорыі і практыкі, але і для паўнацэннага адпачынку.
— Крэда навучальнай установы: праз практычнае навучанне — да глыбокіх ведаў і любві да абранай прафесіі, — расказвае намеснік дырэктара ЛДАКа Святлана Тарасевіч.
Літаральна праз тыдзень пасля першавераснёўскай лінейкі чацвёртакурснікі адправіліся на тэхналагічную практыку ў гаспадаркі Брэстчыны. Будучыя асы ветэрынарнай медыцыны, заатэхніі і агранаміі пацвярджаюць атрыманыя тэарэтычныя веды на практыцы ў гаспадарках Брэстчыны. Некаторыя навучэнцы працуюць на сельгасаб’ектах ЛДАКа.
— Першы семестр у разгары, да пачатку экзаменацыйнай сесіі засталося няпоўных 2 месяцы. І гэты час трэба скарыстаць рацыянальна, каб дасканала і паспяхова падрыхтавацца да здачы залікаў і экзаменаў. Добрыя адзнакі і агульны высокі бал па выніках усіх здач, належныя паводзіны і актыўны ўдзел у грамадскім і культурным жыцці гарантуюць і дастойную стыпендыю, — зазначае Святлана Тарасевіч.
Фотаздымкі выдатнікаў змяшчаюцца на Дошцы гонару. Гэтага права па выніках апошняга семестра 2010/2011 навучальнага года ўдастоены навучэнцы агранамічнага аддзялення Наталля Кулеш, Вольга Пятран, ветэрынарнай медыцыны — Таццяна Дубоўская, Ганна Кунцэвіч, Яўгенія Рашэтнік, Мікалай Лазерка, заатэхніі — Вольга Мазуркевіч, Таццяна Гаўдзей, Дар’я Юнкевіч, Вікторыя Рабцэвіч, плодаагароднінаводства — Вольга Чарнавокая і Крысціна Шаўчук.