Ану, дзяўчаты! Юныя ляхавічанкі маюць свой погляд на маладзёжнае лідарства
Сустрэчы з прадстаўнікамі ўлады і дэпутатамі парламента, абмен меркаваннямі, лекцыі і адукацыйныя праекты, прэс- і відэаканферэнцыі – гэта і многае іншае ўвайшло ў праграму першага форума, мэта якога – дапамагчы раскрыцца юнакам і дзяўчатам у розных сферах жыцця.
– Колькі ўсяго цікавага было за тыдзень! Мне асабліва запомніўся адкрыты дыялог з міністрам адукацыі Ігарам Карпенкам. Таксама я ўдзельнічала ў рабоце тэматычнай пляцоўкі “Моладзь за якасную адукацыю”, – расказвае Насця Богдан.
Дзевяцікласніца гімназіі, школьная актывістка, юнкор, піша ў гімназічную газету “Дзянніца”, удзельнічае ў бээрэсэмаўскіх акцыях, валанцёрскім руху. На ўсё, у тым ліку і вучобу (яна выдатніца) хапае часу, энергіі і жадання. У “Зубраняці” Насця чарговы раз абараняла сваю навукова-даследчую работу “Лінгвістычныя асаблівасці англійскага гумару і спосабы яго перакладу на рускую мову”, якую напісала з дапамогай настаўніцы замежных моў гімназіі Вікторыі Салаўёвай. За актыўны ўдзел у рабоце форума адзначана граматай.
– Спадабаліся майстар-класы па прыкладным мастацтве. Разам з іншымі прадстаўнікамі Брэстчыны цікава прэзентавалі нашу вобласць: складалі вершы, танцавалі. Наша пляцоўка называлася “Жыві для творчасці, стварай для жыцця”. Упершыню пабывала ў “Зубраняці”, і мне спадабалася! – дзеліцца ўражаннямі Ульяна Гусакоўская.
Дзяўчынка займаецца ў гуртку “Кветкавая фантазія” цэнтра дадатковай адукацыі дзяцей і моладзі. Пад кіраўніцтвам педагога Марыны Баргамон стварае прыгожыя кампазіцыі, якія не засталіся не заўважанымі на розных выставах. Работа Ульяны была адзначана спецыяльным прызам у фінале рэспубліканскага конкурсу “Калядная зорка”. Таленавітая дзяўчынка – пераможца абласнога этапу конкурсу “Прывітанне, мірнае лета!”.
Першы форум, галоўная мэта якога – стварэнне ўмоў для развіцця сацыяльнай актыўнасці, патрыятызму, лідарскага патэнцыялу моладзі, ляхавіцкім удзельніцам спадабаўся і запомніўся.
Галіна ЗАРЭЧНАЯ.
Фота Сяргея ВАРАНОВІЧА.