Клімат-кантроль праверыць зіма. На календары восень, а гэта значыць – ацяпляльны сезон не за гарамі. Як ідзе падрыхтоўка да яго ў Ляхавіцкім раёне?

Адзін з асноўных  аб’ектаў у  райцэнтры – цеплавыя сеткі райбальніцы. Дзве чаргі аб’екта завершаны ва ўстаноўленыя тэрміны. А вось з камунікацыямі, па якіх цяпло павінна паступаць у прыватны сектар бліжэйшага мікрараёна, ёсць праблема.  Увод у эксплуатацыю гэтай чаргі быў запланаваны на 1 жніўня. «Ляхавіцкая ЖКГ», якая выконвае работы, у графік не ўклалася. З выдаткаваных па каштарысе  870 тысяч бюджэтных рублёў частка так і не асвоена.  На апаратнай нарадзе старшыня райвыканкама Вячаслаў Сельмановіч гэту работу камунальнікаў ахарактарызаваў адназначна: дрэнна.  Неабходна  неадкладна выпраўляць сітуацыю.

Адна з чатырох кацельняў у Брэсцкай вобласці, якія сёлета пераводзяцца з прыроднага газу на мясцовыя віды паліва, знаходзіцца ў нашым раёне, дакладней, на вуліцы Вакзальнай райцэнтра. Намеснік старшыні райвыканкама Сяргей Юшкевіч удакладніў: камунгас правёў дэмантаж старых катлоў. Нядаўна спецыялізаванае прадпрыемства прыступіла да мантажу новага абсталявання. Работы павінны быць завершаны сёлета да 1 кастрычніка. Кошт аб’екта – 186 тысяч рублёў.

На парадку дня і назапашванне паліўна-энергетычных рэсурсаў.

Далёкая ад аптымістычнай сітуацыя з сезоннай нарыхтоўкай дроў: з планава неабходнага да 1 кастрычніка запасу ў 5000 кубаметраў пад камунгасаўскімі павецямі пакуль знаходзіцца каля 40 працэнтаў. ЖКГ нарыхтоўвае паліва ўласнымі сіламі, частку купляе ў лясгаса. Запазычанасць камунальнікаў перад лясгасам за дровы – амаль 40 тысяч  рублёў.  Куды большыя праблемы з торфабрыкетам. Пры заданні 1000 тон нарыхтавана толькі 140. Справа зноў жа ў запазычанасці: камунгас вінаваты торфабрыкетнаму заводу «Ляхавіцкі» больш як 135 тысяч рублёў.

Атрыманне пашпартоў гатоўнасці – абавязковая працэдура напярэдадні ацяпляльнага сезона. Канчатковая дата, да якой усе спажыўцы павінны атрымаць такі дакумент, – 1 кастрычніка.  Прафілактычны рамонт абсталявання зроблены на ўсіх 24 кацельнях, якія знаходзяцца на балансе ЖКГ. Па стане на 4 верасня 18 абследаваных кацельняў атрымалі ад дзяржпрамнагляду допуск да эксплуатацыі. Прыборы ўліку цяпла ўстаноўлены на ўсіх кацельнях.

На балансе жылкамунгаса 170 жылых дамоў, з якіх 103 з цэнтральным ацяпленнем.  Да ацяпляльнага сезона падрыхтавана больш за 80 працэнтаў.

Працягваецца перакладка  і прамыўка водаправодных сетак, рамонт  каналізацыйных помпаў, прамыўка рэзервуараў, калектараў і каналізацыйных сетак. Завершаны тэхагляд і прафабслугоўванне  артэзіянскіх свідравін, водаразборных калонак.

Установы адукацыі нават рэзкае наступленне халадоў не спалохае. Нарыхтаваны неабходны запас  дроў і брыкету для Навасёлкаўскага дзіцячага садка – адзінай ўстановы адукацыі раёна, якая  ацяпляецца мясцовымі відамі паліва.

Хапае яго і ў медустановах, ацяпляльная сістэма якіх «завязана» на мясцовыя віды паліва.  За кошт уласных сродкаў райбальніцы заменены вокны ў Тальмінавіцкім ФАПе. ААТ «Жарабковічы»  ў якасці спонсарскай дапамогі часткова замяніла вокны ў Падлескай урачэбнай амбулаторыі і ўстанавіла новыя ўваходныя дзверы ў Жарабковіцкім ФАПе.

З мясцовага бюджэту выдаткаваны сродкі на падрыхтоўку да ацяпляльнага сезона і ва ўстановах культуры. Кацельні, якія знаходзяцца на балансе аддзела ідэалагічнай работы, культуры і па справах моладзі райвыканкама, будуць забяспечаны палівам (132 тоны торфабрыкету і 115 кубаметраў дроў) да  15 верасня, запэўніў начальнік аддзела ідэалагічнай работы, культуры і па справах моладзі райвыканкама Мікалай Дабрыянец.  Прыборы ўліку вады, цеплавой энергіі прайшлі дзяржпаверку. Усе гэтыя работы фінансуюцца з бюджэту. Далучыліся да важнай справы і самі работнікі ўстаноў культуры: уцяпляюць дзверы, вокны. Вырашаецца і важнае пытанне з забеспячэннем нармальнай тэмпературы зімой у Ганчароўскім СДК.

Па стане на 4  верасня, пашпарты гатоўнасці атрымалі   64 спажыўцы са 103 і ўсяго   12 цеплакрыніц з 58. Інспектар энерганагляду Аляксандр Бародзіч пералічыў тых, хто не захоўвае графік рэгістрацыі  пашпартоў гатоўнасці: РАУС, ЛДАК,  Ганчароўскі і Жарабковіцкі сельвыканкамы, «Інтэрлак», «БелДан», «Ібіра», «ТМТ», раённая кінавідэасетка, ільнонасенстанцыя, «Шлях новы». Не звяртаўся па пытаннях атрымання такіх пашпартоў  для шматкватэрных жылых дамоў, што знаходзяцца на яго балансе, камунгас.