Самагонныя рэкі, нецвярозыя берагі
Даўно вядома, што часта адурманены алкаголем чалавек паводзіць сябе не проста неадэкватна, а з’яўляецца небяспечным для грамадства. Толькі за мінулы год кожнае пятае злачынства па лініі крымінальнага вышуку здзейснена ў раёне нецвярозымі асобамі. Участковыя інспектары склалі 665 адміністрацыйных пратаколаў на грамадзян, якія распівалі спіртныя напіткі ў грамадскіх месцах або з’яўляліся ў іх “пад градусам” (згодна артыкула 17.3 Кодэкса аб адміністрацыйных правапарушэннях Рэспублікі Беларусь).
За 2011 год супрацоўнікамі раённага аддзела ўнутраных спраў выяўлена 96 (за 2010 год – 83) фактаў парушэння антыалкагольнага заканадаўства, а менавіта – незаконнай рэалізацыі алкагольнай прадукцыі. Згодна артыкула 12.43 КаАП за выраб моцных алкагольных напіткаў (самагон, брага), захоўванне апаратаў для іх вы-творчасці прадугледжваецца штраф у памеры да 5 базавых велічынь з канфіскацыяй гэтых напіткаў і апаратаў.
За паўторнае выяўленне такіх дзеянняў на працягу года або выраб ці захоўванне больш як 5 літраў самагону ці больш як 30 літраў брагі штраф складзе ад 5 да 30 базавых велічынь таксама з канфіскацыяй. За мінулы год міліцыяй выяўлена і знішчана 757 літраў самагону і брагі, 24 літры фальсіфікаваных спіртных напіткаў і 30 самагонных апаратаў. Ужо сёлета ў адной гаспадыні з Гарадзішча знойдзена 55 літраў самагоннай брагі. Дарэчы, яе падпольная “лабараторыя” алкагольнай атруты ўжо не першы раз трапляе ў поле зроку міліцыянераў. Жанчына плаціла штраф за свае супрацьпраўныя дзеянні, але па-ранейшаму займаецца самагонаварэннем. Цяпер да яе будуць прымацца больш жорсткія меры ўздзеян-ня.
Наогул, асабліва ”папулярны” гэты супрацьзаконны промысел, згодна міліцэйскай статыстыкі, у Тухавічах і Свяціцы.
Не застаюцца без пакарання рублём і аматары купіць спіртныя напіткі, прыгатаваныя самагонавытворцамі. Іх чакае штраф да 5 базавых велічынь, а таксама давядзецца ў прымусовым парадку развітацца з “сівухай”.
Большасць такіх сяброў зялёнага змея нідзе не працуе, вядзе амаральны лад жыцця, яны сталі сапраўднай бядой не толькі для сваіх родных і блізкіх, але і для грамадства, не могуць і не жадаюць нешта мяняць у сваім жыцці. Тым не менш, змагацца з такімі негатыўнымі праявамі як п’янства і алкагалізм неабходна. Летась на прымусовае лячэнне ад алкагалізму ў лячэбна-працоўныя прафілакторыі судом накіраваны 16 хранічных алкаголікаў, 14 з іх ужо ізаляваны.
Страшная з’ява – п’яны за рулём. Такі гора-вадзіцель небяспечны для ўсіх удзельнікаў дарожнага руху. За мінулы год супрацоўнікамі АДАІ РАУС затрымана 211 вадзіцеляў, якія кіравалі транспартнымі сродкамі ў стане алкагольнага ап’янення.
Добрасумленныя грамадзяне, якім неабыякавы лёс іншых, асабліва падрастаючага пакалення, рознымі метадамі змагаюцца з распаўсюджваннем п’янства і алкагалізму. Каб папярэдзіць гібель людзей ад выпадковага атручвання алкаголем, звяртаемся з просьбай да ўсіх, хто мае звесткі аб дзейнасці асоб, якія займаюцца незаконным абаротам, вытворчасцю, захаваннем ці рэалізацыяй самагоннай прадукцыі, тытунёвых вырабаў, паведаміць пра такія супрацьзаконныя дзеянні ў органы ўнутраных спраў. Канфідэнцыяльнасць атрыманых звестак гарантавана. Працуе і кругласутачная “прамая лінія” РАУС “П’янству – бой”. Тэлефануйце па нумарах: 102, 2-48-37. Дзейнічаюць і тэлефоны “гарачай лініі” па барацьбе з п’янствам і самагонаварэннем – 8-029-6878986, 8-029-8274466, 8-0162456215. Кожны званок важны.
Аляксандр БУРБІЦКІ,
першы намеснік начальніка РАУС