Колькі Дзюймовачак у Свяціцы?

Не паверыце — ажно сем! Некаторыя жывуць тут пастаянна, а іншыя прыехалі да сваіх бабуль на летнія канікулы. Гэта Яна Шульц, Даша Буйкевіч, Віка Шпак, стрыечныя  сёстры Ліза  Арцішэўская і Ніка Маслабоева, Маша  Русакевіч і Паліна Рацэвіч. Усе яны сталі ўдзельніцамі вясёлага і яркага шоу —  «Міс Дзюймовачка-2012», якое нядаўна адбылося ў Свяціцы.

Свае здольнасці юным прэтэндэнткам на тытул трэба было паказаць у намінацыях «Раскажы пра сябе», «Пявуння», «Зрабі аплікацыю», «Гаспадынька»,»Адгадай загадку», «Чытальніца». Усе Дзюймовачкі вельмі стараліся.  Расказвалі пра сябе ў вершаванай форме, спявалі і дэкламавалі вершы. А якімі гаспадынькамі аказаліся: хуценька перабралі гарох і фасолю, зрабілі прыгожыя аплікацыі.

Незвычайную, прыўзнятую атмасферу ў зале Дома культуры стваралі вытанчаныя ўборы ўдзельніц, аздабленне сцэны, інтэр’ер, мноства кветак, вясёлая музыка. Абаяльныя вядучыя — бібліятэкар СДК Кацярына Буйкевіч і яе ўнучка Саша Вяроўка, — так артыстычна вялі праграму , што і гледачы  аказаліся ўдзельнікамі свята. У перапынках паміж конкурсамі пранікнёна спявалі Лена Параскевіч, Віка Соц і вядучая Аляксандра  Вяроўка. «Азмрочвалі » свята хіба што Баба Яга і Старая Шапакляк, якія невядома як прабраліся на конкурс. Пад выглядам прыбіральшчыц яны ўсяляк «перашкаджалі» прадстаўленню і нават выключалі святло, бо вельмі ж хацелі атрымаць падарункі! Нават з ліхтарыкам шукалі, дзе тыя ляжаць. Ды нічога  ў іх не  выйшла, а вядучыя ў рэшце рэшт дазволілі казачным героям застацца на свяце. Іх ролі  сыгралі  Ганна Буйкевіч і Яна  Русакевіч.

Нарэшце,  строгае журы падвяло вынікі цудоўнага конкурсу.

Яна Шульц стала «Міс Дзюймовачка-2012 Усмешка», Даша Буйкевіч — «Міс Дзюймовачка-2012 Зачараванне», Ліза  Арцішэўская  атрымала тытул «Міс Пяшчотнасць», Ніка Маслабоева — «Міс Жамчужынка», Віка Шпак — «Міс Іскрынка». А Паліна Рацэвіч, акрамя тытула «Міс Пявуння», атрымала  і прыз глядацкіх сімпатый.

А  галоўнай Дзюймовачкай стала самая маленькая ўдзельніца шоу Маша  Русакевіч. Яна ва ўсіх намінацыях была лепшай. Машанька з вядомай у Свяціцы шматдзетнай сям’і Ірыны і Вячаслава Русакевічаў, у якой выхоўваецца шасцёра дзяцей. Яе мамачка Ірына ўзнагароджана Ордэнам Маці.

Усе Дзюймовачкі атрымалі падарункі, а пераможца конкурсу  яшчэ і карціну з рук дырэктара СДК Мікалая Буйкевіча. Гледачы, вядома, узнагародзілі дзяўчынак дружнымі апладысментамі. Усім прысутным надоўга запомніцца гэтае незвычайнае святочнае прадстаўленне.

Спонсарам свята выступіў мясцовы прадпрымальнік Васіль Курловіч.

Вера Шыловіч, в. Свяціца