На «Белагра» за тэхналогіямі
Каля 50 арганізацый Нацыянальнай акадэміі навук Беларусі прымаюць удзел у 29-й міжнароднай сельскагаспадарчай выстаўцы «Белагра», дзе прадстаўляюць больш за 200 распрацовак і тэхналогій.
У прыватнасці, Навукова-практычны цэнтр НАН па земляробстве дэманструе насенне новых сартоў асноўных сельскагаспадарчых культур, створаных вучонымі-аграрыямі на базе цэнтра.
Інстытут лёну паказвае новыя сарты льну-даўгунцу з высокім патэнцыялам ураджайнасці і прадукцыйнасці. Інстытут аховы раслін прадставіў біяпрэпараты, створаныя на аснове мясцовых штамаў мікраарганізмаў-антаганістаў. Гэтыя прэпараты не толькі садзейнічаюць павышэнню ўраджайнасці і паляпшэнню якасці прадукцыі, але і з’яўляюцца экалагічна бяспечнымі, не назапашваюцца ў раслінах, не шкодныя для чалавека, жывёл, карысных насякомых, садзейнічаюць змяншэнню накаплення раслінамі радыенуклідаў.
На выставачных стэндах Навукова-практычнага цэнтра НАН па бульбаводстве і плодаагародніцтве наведвальнікі выстаўкі могуць азнаёміцца з новымі сартамі бульбы, унікальнымі па ўраджайнасці, таварнасці і лёжкасці.
Міжнародная спецыялізаваная выстаўка «Белагра-2019» праходзіць 4-9 чэрвеня на тэрыторыі ТЛЦ «Глобус Парк» у Шчамысліцы.
Інфаграфіка БЕЛТА.
