Ляховичский районный отдел Следственного комитета подводит итоги работы

Адлік сваёй дзейнасці Следчы камітэт Рэспублікі Беларусь пачаў з 1 студзеня 2012 года. Асноўная задача ведамства – аператыўнае і якаснае правядзенне папярэдняга расследавання крымінальных спраў.

2 гады дзейнічае і Ляхавіцкі РАСК. Якім быў 2013 год для ляхавіцкіх следчых — у размове з начальнікам раённага аддзела Следчага камітэта падпалкоўнікам юстыцыі Віталіем Лабанавым.

— Віталій Аляксандравіч, якія справы ў асноўным даводзіцца распутваць следчым вашага аддзела?

— На сённяшні дзень гэта практычна ўсе катэгорыі крымінальных спраў – ад кіравання транспартам у нецвярозым стане да забойстваў, цяжкіх цялесных пашкоджанняў, карупцыйных, эканамічных, фінансавых, падатковых злачынстваў.

У мінулым годзе ў вытворчасці супрацоўнікаў райаддзела знаходзілася 200 крымінальных спраў (для параўнання: у 2012 годзе – 274). 151 узбуджана нашымі следчымі. Сярод злачынстваў па-ранейшаму пераважаюць крадзяжы – 77, 8 спраў узбуджана ў адносінах гора-бацькоў, якія не плацяць аліменты, 12 — па фактах раскрадання, 4 – падробкі дакументаў. Калі гаварыць пра злачынствы, накіраваныя супраць жыцця і здароўя грамадзян, то расследавалася адно забойства, 3 справы па нанясенні цяжкіх цялесных пашкоджанняў, 2 – пагрозы забойствам. У поле зроку следчых траплялі аматары незаконнай рыбалкі і палявання, махляры, угоншчыкі транспартных сродкаў, хуліганы і іншыя грамадзяне, якія не сябруюць з законам.

У суд накіравана 82 крымінальныя справы, з якіх 2 – групавыя. Да крымінальнай адказнасці прыцягнуты 84 злачынцы, 2 з іх непаўналетнія.

Летась не дапушчана фактаў вяртання спраў на дадатковае расследаванне, незаконных затрыманняў, неабгрунтаваных прыцягненняў грамадзян да крымінальнай адказнасці. Сярод станоўчых момантаў адзначу зніжэнне колькасці спраў, перададзеных пракурору для накіравання ў суд, на 34,9 працэнта ў параўнанні з 2012 годам. У першую чаргу гэта тлумачыцца скарачэннем крымінальных спраў, якія знаходзіліся ў вытворчасці.

— Статыстыка сведчыць, што многія грамадзяне, якія пераступаюць закон, знаходзяцца пад уздзеяннем алкаголю…

— Так яно і ёсць. П’яны не заўсёды рэальна ацэньвае, што ідзе супраць закона. Ёсць і такія, хто разумее, што робіць няправільна, не па закону, і вырашае выпіць для смеласці. А злачынства, учыненае ў стане ап’янення, незалежна ад таго, алкагольнага, наркатычнага ці таксікалагічнага, караецца больш жорстка. Так, на пачатку мінулага лета два непрацуючыя падляшаніны ў стане алкагольнага ап’янення па папярэдняй дамоўленасці вырашылі, што называецца, ”разабрацца” з рабочым СВК “Жарабковічы”, які часова пражываў у інтэрнаце ў Падлессі. І ўсё таму, што мужчына зрабіў заўвагу п’яным парушальнікам грамадскага парадку ў магазіне. Вечарам таго ж дня “пакрыўджаныя” ўзброіліся пнеўматычным газабалонным пісталетам і цацачнай зброяй, уварваліся ў адзін з пакояў інтэрната. Нанеслі цялесныя пашкоджанні двум мужчынам, у неадэкватным стане пагражалі зброяй і прымяненнем насілля яшчэ сямі чалавекам. Сваімі наўмыснымі дзеяннямі груба парушылі грамадскі парадак і паказвалі яўную знявагу да іншых людзей, прымянялі і выказвалі пагрозы прымянення сілы. Яны ўчынілі злоснае хуліганства – злачынства, прадугледжанае часткай 2 артыкула 339 Крымінальнага кодэкса Рэспублікі Беларусь. Раённым аддзелам Следчага камітэта супраць іх была ўзбуджана крымінальная справа.

— Віталій Аляксандравіч, як вы ацэньваеце работу райаддзела Следчага камітэта за мінулы год?

— Работа РАСК ацэнена як здавальняючая. Такая адзнака была агучана сёлета на аператыўнай нарадзе з удзелам усіх супрацоўнікаў.

Разам з тым, ёсць нямала накірункаў для ўдасканалення. У прыватнасці, гэта больш якаснае расследаванне крымінальных спраў, своечасовае правядзенне следчых дзеянняў, недапушчэнне валакіты.

Сёлета, як і ў мінулым годзе, будуць праводзіцца дадатковыя заняткі для ўдасканалення службовай падрыхтоўкі маладых супрацоўнікаў аддзела. Тое, што напрыканцы мінулага года аддзел справіў наваселле, безумоўна, палепшыла ўмовы работы, станоўча адаб’ецца на яе якасці і аператыўнасці.

Задачы перад РАСК стаяць даволі сур’ёзныя – сумесная работа з органамі ўлады, міліцыі, пракуратуры, грамадскімі аб’яднаннямі, садзейнічанне развіццю раёна, прафілактыка.

Хачу адзначыць, што калектыў у райаддзеле даволі прафесіянальны. Больш вопытныя аказваюць дапамогу і падтрымку маладым. Сярод лепшых супрацоўнікаў — намеснік начальніка Ляхавіцкага РАСК падпалкоўнік юстыцыі Аляксандр Траяноўскі і старшы следчы маёр юстыцыі Дзмітрый Гатоўчыц.

Гутарыла Галіна КАНЬКО.