У пятніцу, пасля абеду, самы час пасля чарговага «чыстага чацвярга» паглядзець, што зроблена

Зарасла хмызняком і смеццем гарадская «Крыніца».

Традыцыйны месячнік па добраўпарадкаванні праходзіць па ўсёй краіне. У гарадах і вёсках чысцяць, зграбаюць, падмятаюць, рамантуюць, падсыпаюць каля ўласных сядзіб, на дачах, агародах, у дварах, каля адміністрацыйных будынкаў, месцаў грамадскага адпачынку. Але, на жаль, не ўсюды і не ўсе. У чым і ўпэўніліся карэспандэнты “ЛВ”   у мінулую пятніцу.

Спачатку зазірнулі ва ўнутраны двор за магазінам “Родны кут” і кафэ “Калі ласка”: тут стала больш парадку, чым раней. Падмецена, смецце сабрана ў невялікія кучкі, абрэзана кустоўе, устаноўлены кантэйнеры. Праўда, яны хоць і прызначаны для паасобнага збору адходаў, чым толькі не запоўнены.

Псуе ў цэлым нядрэнную карціну цэлая гара  таго, што раней было  мэбляй, а цяпер гаспадары дома № 26 па вуліцы Леніна звалілі ў двары. Як запэўніла адна з тутэйшых жыхарак, часовую звалку прапанаваў зрабіць камунгас, паабяцаўшы пасля нядзелі (10 красавіка) усё вывезці. Праўда, гэта куча пачала расці яшчэ з мінулай восені.

З прыходам цяпла не пазайздросціш жыхарам вуліцы Цітовіча, асабліва тым, чый шлях ляжыць каля былога адміністрацыйнага будынка райпо. Што захоўвае ў падвальным памяшканні новы гаспадар, не ведаю, ды ад усяго гэтага ідзе такі “водар”, што ніякае свежае вясновае паветра яго не перабівае. І за будынкам – безгаспадарчасць: тэрыторыя ўсыпана рэшткамі будаўнічых матэрыялаў. Наводзіць парадак не спяшаюцца. Колькі часу працягваецца такая карціна, якая ўжо трапляла ў аб’ектыў фотакарэспандэнта “ЛВ” – а перамен да лепшага не відаць.

Пройдзем далей – за мостам праз Ведзьму ёсць цікавае месца, якое б магло стаць адной з візітовак нашага райцэнтра. Яшчэ нядаўна гарадская “Крынічка” была параўнальна ўладкаванай і ўтульнай, прыцягвала ўвагу шматлікіх прахожых. Сённяшняя карціна дагледжанасцю не вызначаецца. Наўрад ці хто вырашыць папіць вадзіцы з такой крыніцы. Сумна, аднак. А яшчэ крыўдна. Змаглі ж у суседняй Сіняўцы Клецкага раёна ператварыць звычайную крыніцу ў добраўпарадкаваны куточак, эстэтычна аформлены, куды пасля загса абавязкова заходзяць маладыя – на шчасце.

А ад ляхавіцкай крыніцы некалькі метраў да зараснікаў кустоўя, дрэў, дзе натыкаешся на сметнік, які прарос пустазеллем. Насупраць такі ж вэрхал, праўда ўжо на прысядзібных участках дамоў па завулку Пугачова. Сумная карціна вельмі супярэчыць вясне…

Так званая прамысловая зона райцэнтра месячнік сустрэла ва ўсеўзбраенні. Многія паспелі навесці чысціню, напрыклад, работнікі ДРБУ-200, якія выйшлі з кабінетаў і добраўпарадкоўвалі тэрыторыю вакол свайго адміністрацыйнага будынка.

Клапоцяцца пра парадак і прыгажосць ля сваіх аб’ектаў выратавальнікі, лясгасаўцы, будаўнікі, работнікі райаграсэрвіса, ПМК-17 і ПМК-13. Каля кааппрама і клумбы разбіты, і кветкі пасаджаны, і парадак наведзены. А калі зайсці з супрацьлеглага боку – зусім іншы малюнак…

Прыемна глянуць на парк па вуліцы Вакзальнай. Усё ў парадку з парадкам і каля будынка былога гандлёвага цэнтра.

У якую пару года, у які час ні завітаеш на чыгуначны вакзал, каб і хацеў прычапіцца, няма да чаго – нібы толькі ўчора зрабілі капітальны рамонт. А побач, праз вузкую палоску заасфальтаванай дарогі (за магазінам і базай райпо) – супрацьлеглая карціна: смецце, папера, бутэлькі, сухія галінкі і ўсялякі бруд. Чым далей – тым горш.

Не самы прывабны пейзаж трапіў у аб’ектыў фотакарэспандэнта “ЛВ” і на ўзлеску па дарозе з Ляхавічаў у Задвор’е. Хапае тут рэшткаў мінулагодніх і сёлетніх пікнікоў. Не варта раўняцца і на тых прыбіральшчыкаў, якія смецце… схавалі пад галлём.

Па дарозе з райцэнтра ў Русінавічы спыніліся каля месца, дзе дарожнікі захоўваюць пясчана-саляную сумесь. Зноў убачылі несанкцыянаваны сметнік: рэшткі жывёльных шкілетаў, будаўнічыя адходы, папера… Да заканчэння традыцыйнага Тыдня лесу заставалася  2 дні. Цікава, ці дайшлі сюды зялёныя патрулі, валанцёры і работнікі лясгаса?

Месячнік добраўпарадкавання прадаўжаецца. Ёсць час выправіць памылкі і стварыць навокал чысціню і прыгажосць.

Галіна КАНЬКО.

Фота Сяргея ВАРАНОВІЧА.

На вуліцы Вакзальнай за базай райпо.

Беспарадак за былым адміністрацыйным будынкам райпо

За магазінамі райпо па вуліцы Цітовіча.