Прыходзьце да нас яшчэ!

Ва ўрачыстай абстаноўцы   14 кастрычніка маладым бацькам Дзіне і Сяргею Дарашкевічам загадчыца аддзела загса Людміла Палтарак уручыла пасведчанне аб нараджэнні дачкі Ванэсы. Бацькі не хавалі радасці: малышка, якая нарадзілася  7 кастрычніка, іх першае і доўгачаканае дзіця. Дарэчы, Дарашкевічы стварылі сям’ю чатыры гады назад і шлюб рэгістравалі таксама ў гэтай зале.

– І тады, падчас урачыстай рэгістрацыі, я запрашала вас прыйсці сюды зноў, за атрыманнем пасведчання аб нараджэнні дзіцяці. Прыходзьце да нас часцей! –  звярнулася да маладых бацькоў Людміла Палтарак.

Дзіна і Сяргей не хаваюць планаў – яны мараць пра гэта. А пакуль уласнымі сіламі, з дапамогай родных будуюць свой дом. Тым больш, што вопыт узвядзення жылля ёсць: Сяргей Дарашкевіч працуе ў ПМК-13, там жа да дэкрэтнага водпуску працавала і Дзіна.

Галіна ЗАРЭЧНАЯ.

Фота Сяргея ВАРАНОВІЧА.