Саксафон пачакае

Канцэртны касцюм на салдацкую гімнасцёрку гэтымі днямі змяніў і ляхавічанін Павел Кірмель. Яшчэ ўчора – выкладчык Ляхавіцкай дзіцячай школы мастацтваў па класе саксафона, удзельнік народнага духавога аркестра ГДК, сёння ён ужо разам з іншымі навабранцамі стаў у армейскі строй.

– Заўсёды ведаў, што мне калісьці належыць стаць салдатам. Кожны сапраўдны мужчына абавязкова павінен прайсці гэту жыццёвую школу. У свой час служылі мае дзяды, бацька, цяпер прыйшла і мая чарга выканаць свой грамадзянскі абавязак. А што датычыцца музыкі, ведаю, што і ў арміі змагу займацца любімай справай, – сцвярджае Павел.

У мінулы чацвер родныя, блізкія, сябры і калегі ўрачыста праводзілі юнака да ваенкамата і наказвалі годна служыць. Наперадзе ў Паўла Кірмеля школа маладога байца, прысяга і паўтара года салдацкіх будняў у адной з вайсковых часцей у Баранавічах.