Пунсовы колер дапамогі
Тыдзень донарства завяршыўся ў нашым раёне папаўненнем радоў тых, для каго міласэрнасць і дабрачыннасць у першую чаргу – справа. 18 навучэнцаў Ляхавіцкага дзяржаўнага аграрнага каледжа па праве могуць лічыць, што пазапраграмны экзамен на свядомасць і чалавечнасць яны здалі з выдатнай адзнакай. Гэтыя юнакі і дзяўчаты падзяліліся сваёй крывёю, якая, магчыма, камусьці выратуе жыццё.
– Шчыры дзякуй усім удзельнікам акцыі, хто асэнсавана і сціпла зрабіў такі высакародны крок. Моладзь у нас цудоўная, што пацвердзіла і яе стаўленне да ўдзелу ў дабрачынным донарстве. Дзякуй і кіраўніцтву ЛДАКа за разуменне, дапамогу ў арганізацыі гэтай акцыі і за плён выхаваўчай работы, – намеснік галоўнага ўрача цэнтральнай раённай бальніцы Ірына Волкава не стамляецца паўтараць, наколькі жыццёва важная справа – донарства.
Дарэчы, колькасць землякоў, якія папаўняюць донарскія рады, расце. Сёлета іх ужо было больш за сотню. Такая вось прыгожая статыстыка дабрачыннасці.
Вольга СВЯТЛОВА.
Фота Сяргея ВАРАНОВІЧА.