Экспрэс- навіны Ляхавіччыны

Ляхавіцкі каток запрацаваў!

• НАЗНАЧЭННІ. Па інфармацыі аддзела арганізацыйна-кадравай работы райвыканкама, з 30 студзеня выконваючым абавязкі старшыні Крывошынскага сельскага выканаўчага камітэта назначаны Уладзімір Міхайлавіч ВАРВАШЭВІЧ. Раней ён працаваў старшынёй СВК “Ліпнянка”.

• НА ТАТАМІ. Як паведаміла дырэктар дзіцяча-юнацкай спартыўнай школы Валянціна Русакевіч, у суботу  ў ДЮСШ пройдзе першынство Рэспублікі Беларусь па самба сярод дзяўчат і юніёрак. Адкрыццё спаборніцтваў у 16 гадзін.

• БЯСПЕЧНАЕ СУСЕДСТВА. З 29 студзеня па 9 лютага ў краіне праводзіцца рэспубліканская акцыя “Бяспечнае суседства”. Яе мэта – павышэнне ўзроўню бяспекі насельніцтва (асабліва пажылых людзей), узмацненне аховы грамадзян ад супрацьпраўных замахаў і надзвычайных сітуацый, аказанне іншай, у тым ліку, адраснай дапамогі.

Першы намеснік начальніка райаддзела ўнутраных спраў Аляксандр Бурбіцкі расказаў, што ў РАУС арганізавана работа “прамой лініі” (тэл. 102, 2-48-37, маб. 827-44-66), на якую можна паведаміць пра неўладкаваныя сем’і, асоб, якія злоўжываюць спіртным і вядуць антыграмадскі лад жыцця.

Супрацоўнікі РАУС правядуць растлумачальную работу з грамадзянамі, у чыім жыллі збіраюцца асобы, якія вядуць асацыяльны лад жыцця.

• НАЕЗД. Як паведаміў начальнік АДАІ РАУС Юрый Малевіч, 6 лютага каля 5 гадзін раніцы на 9-м кіламетры аўтадарогі Баранавічы-Ляхавічы пад колы аўтамабіля трапіў жыхар Лідскага раёна 1964 г.н., які не быў пазначаны святлоадбівальнымі элементамі. Пешаход загінуў на месцы здарэння. Як паказала экспертыза, вадзіцель быў цвярозы. Узбуджана крымінальная справа.