Дзённік ільнавода. У Ляхавіцкім раёне пачалося церабленне льну-даўгунцу

У раёне пачалося церабленне льну-даўгунцу. Параўнальна невялікія, аднак даволі частыя дажджы бягучага тыдня не дазволілі галоўнаму ляхавіцкаму льнаводу і адначасова льноперапрацоўшчыку развіць свой стартавы поспех.

За дастаткова кароткі тэрмін да дажджоў у ААТ «Ляхавіцкі льнозавод» атрымалася, па словах дырэктара прадпрыемства Дзмітрыя Скакуна, выцерабіць прыкладна дзясятую частку льнопасеваў. У бягучым годзе пасевы нязначна павялічыліся ў плошчах: з 2200 леташніх гектараў да 2260 сёлетніх. Акрамя таго, сыравінную базу завода дапоўніць ураджай ільнотрасты з чатырох сотняў гектараў міжраённай ільнонасенстанцыі і з трох сотняў гектараў, размешчаных ва ўгоддзях Баранавіцкага райаграсэрвіса.

Пра планы на ўраджай 2026 года Дзмітрый Скакун гаворыць вельмі асцярожна: маўляў, не той лён, што ў полі, а той, што пад шахой. Але ўжо зараз відавочны той факт, што і церабленне, і ўсе наступныя аперацыі на працяглым шляху ўборкі льнотрасты будуць няпростымі. Акрамя высокага прафесіяналізму,
на кожнай з амаль дзясятка палявых аперацый ад работнікаў сельскагаспадарчага мехатрада завода патрабуюцца акуратнасць і ашчаднасць дзеянняў, уменне «падладжвацца» пад адметнасці асобнага льнопалетка.
Справа ў тым, што, як летась, на плошчах гэтага года адзначаецца значны працэнт турбулентнай – з перамешваннем раслін – палегласці. А гэта зніжае тэмпы работ ужо на стадыі цераблення. І не толькі, не ў плюс падобны расклад і «нумарным» паказчыкам будучай ільнотрасты.
У гэтым годзе парк церабілак ільнозавода атрымаў дапаўненне. У арсенале прадпрыемства цяпер іх сем адзінак замест шасці ранейшых. Усе гатовы ўключыцца ў работу. І ўключацца, як толькі дазвол на гэта дасць надвор’е.
Іван КАВАЛЕНКА.
Фота Сяргея ВАРАНОВІЧА.