Зіма знянацку не застане
Падрыхтоўка да чарговага ацяпляльнага сезона ў руплівых гаспадароў пачынаецца, як толькі
заканчваецца папярэдні перыяд халадоў.
КУМВП ЖКГ “Ляхавіцкая ЖКГ” якраз і адносіцца да катэгорыі тых гаспадароў, якія рыхтуюць сані летам. А дакладней ужо з красавіка пачынаюць яшчэ раней запланаваныя работы да наступных халадоў, каб зіма знянацку на застала. Пра гатоўнасць камунгаса да ацяпляльнага сезона – размова з дырэктарам прадпрыемства Аляксандрам Мядзвецкім.
— Аляксандр Яўгеньевіч, з чаго камунгас пачаў падрыхтоўчыя работы?
— Так атрымліваецца, што ў нас ацяпляльны сезон доўжыцца цэлы год. Маецца на ўвазе не толькі непасрэдна працэс падачы цяпла ў дамы, установы, арганізацыі і на прадпрыемствы, але і падрыхтоўка да зімы. Сёлета яшчэ ў красавіку жылкамунгас атрымаў загад Міністэрства жыллёва-камунальнай гаспадаркі Рэспублікі Беларусь аб падрыхтоўцы да новага ацяпляльнага сезона, і непасрэдна на прадпрыемстве мы зацвердзілі мерапрыемствы з 65-ці пунктаў. Асноўнае – работы па замене і рамонце цеплавых сетак, абсталявання кацельняў і саміх кацельняў, падрыхтоўка цэнтральных цеплавых пунктаў, водаправода, каналізацыі, добраўпарадкаванне, падпісанне пашпартоў гатоўнасці, паверка прыбораў уліку, падрыхтоўка спецыялізаванай снегаўборачнай тэхнікі і іншае.
— Якія самыя буйныя аб’екты планаваліся на гэты год?
— Вялікі аб’ём работы выкананы па замене цепласетак на вуліцы Мінскай у райцэнтры, каля бібліятэкі па вуліцы Гагарына. На жаль, жыхары дамоў № 9 па вуліцы Гагарына і № 12 па Мінскай на ўвесь час гэтых работ за-ставаліся без гарачай вады. Мы сваё абяцанне выканалі і напрыканцы мінулага тыдня пачалі падачу гарачай вады спажыўцам. У Каранеўшчыне — са-старэлыя трубы цепласетак заменены на больш сучасныя перадізаляваныя. Асобная размова пра цеплакрыніцы — іх на балансе камунгаса 25. 21 з іх ужо маюць падпісаныя пашпарты гатоўнасці, яны ў любы момант гатовы пачаць ацяпляльны сезон. Раней кацельня ў Федзюках была камбінаванай (2 катлы працавалі на мясцовых відах паліва і столькі ж — на газу). Цяпер яна “перакваліфікавана” і будзе даваць цяпло толькі за кошт дроў і брыкету. Практычна ўсе кацельні раёна, за выключэннем псіхіятрычнай бальніцы “Крывошын”, гатовы да работы. Што датычыцца апошняй, то ў 2006 годзе тут былі ўстаноўлены 3 катлы, з якіх 2 выйшлі са строю. Для іх замены камунгас на заводзе “Камунальнік” у Гомелі заказаў спецыяльныя трубчатыя элементы, і да 30 верасня яны будуць устаноўлены. Да таго ж устаноўлены 2 дадатковыя катлы.
Адрамантавана водапомпавая вежа на вуліцы Южакова ў райцэнтры, што дазволіць зменшыць звышнарматыўныя страты вады, забяспечыць бяспечны стан вежы для людзей, якія жывуць побач. Камунгас набыў і новы цеплаабменнік, які на пачатку сезона запусцілі ў дзеянне для абслугоўвання вуліц Южакова і Будаўнікоў. Гэта не толькі палепшыць якасць гарачай вады, але і дазволіць выканаць важны сацыяльны стандарт пры меншых эканамічных стратах. Дарэчы, такія цеплаабменнікі ўстаноўлены на вытворчай базе камунгаса, на доме № 52 па вуліцы Леніна (у планах іх устаноўка ў Задвор’і і на вуліцы Чкалава ў райцэнтры). Згодна дагавора, да 30 верасня будуць пастаўлены газагарэлачныя блокі ў кацельню гімназіі, чым вырашыцца пытанне па надзейным забеспячэнні цяплом мікрараёна вуліцы Інтэрнацыянальнай.
У любы момант гатова ўступіць у бой з непагодай і снегаўборачная тэхніка.
— Аляксандр Яўгеньевіч, заспакоіце Вы жыхароў Ляхавіччыны ці не, адказваючы на пытанне: ці будзе ў памяшканнях зімой цёпла? Як справы з нарыхтоўкай мясцовых відаў паліва?
— Магу адразу заспакоіць: мерзнуць не будзем. Для параўнання: па стану на 16 верасня 2010 года было нарыхтавана і знаходзілася пад навесамі 2183 кубаметры дроў, а на 16 верасня 2011 года — 2670 кубаметраў. Перавышаюць мінулагоднія і запасы брыкету. На ўсіх кацельнях, дзе складзіруюцца дровы і брыкет, створаны належныя ўмовы для захавання, зроблены спецыяльныя навесы. Штодзённа вя-дзецца ўлік колькасці нарыхтаваных дроў, на кожны тыдзень брыгада па нарыхтоўцы дроў атрымлівае планавае заданне, якое пастаянна выконваецца.
Асноўным пастаўшчыком мясцовых відаў паліва з‘яўляецца ААТ “Торфа-брыкетны завод “Ляхавіцкі”. Хачу скарыстацца магчымасцю і выказаць праз “ЛВ” падзяку кіраўніцтву торфабрыкетнага за ўзаемадзеянне і разуменне важнасці і актуальнасці такога пытання, як нарыхтоўка паліва. Лічу, што праблем у ацяпляльным сезоне, звязаных з мясцовымі відамі паліва, не будзе.
— Канешне, лепш пазбегнуць вострых сітуацый падчас ацяпляльнага сезона, але ўсё ж якія праблемныя пытанні выклікаюць найбольшую занепакоенасць?
— Некаторыя ўчасткі цеплавых сетак у райцэнтры зношаныя. З 70 кіламетраў (такая працягласць цеплавых сетак) за апошнія 5 гадоў заменена на новыя больш 20 кіламетраў. Поўнасцю заменены старыя цепласеткі ў Ліпску, Галаўнінцах, Начы, Жарабковічах, Тальмінавічах. Асабліва адчувальны фізічны знос цеплавых сетак каля дамоў №№ 21 і 23 па вуліцы Чкалава, таму там праблемы падчас халадоў не выключаюцца. Будзем трымаць такія адрасы пад пільным кантролем і аператыўна рэагаваць на сітуацыю. Аднак, на цеплазабеспячэнне астатніх мікрараёнаў горада гэта ніякім чынам не паўплывае. Да таго ж рамонтныя спецыялізаваныя брыгады ўкамплектаваны ўсёй неабходнай тэхнікай і інструментамі, таму любыя пашкоджанні ці аварыйныя сітуацыі будуць адразу ліквідавацца. Камунгас гатовы да непрыемных сюрпрызаў надвор’я. Пры любых абставінах зіма знянацку нас не застане. І яшчэ. У чарговы раз хочацца звярнуцца да жыхароў Ляхавіччыны з просьбай і пажаданнем зрабіць усё магчымае, каб у дамах і кватэрах знізіць уцечку цяпла, для чаго неабходна ўцяпліць дзверы і вокны, паставіць заслону скразнякам і г. д.
І незалежна ад сезона не забывайцеся своечасова і ў поўным аб’ёме аплачваць камунальныя паслугі. Давайце будзем узаемаветлівымі.
— Дзякуй за размову.
Галіна КАНЬКО
