Адпачынак з гарантыяй

Галоўны спецыяліст па аздараўленні Алена Булатая расказала, што летась жыхарам Ляхавіцкага раёна выдадзена 205 пуцёвак у здраўніцы, у тым ліку 84 – дзецям. Асаблівай папулярнасцю ў нашых землякоў карыстаюцца санаторыі “Крыніца”, “Сасновы Бор”, “Бярэсце”, “Буг”, “Алеся”. Хлопчыкам і дзяўчынкам спадабаліся “Баравічок”, “Асілак”, “Случ”, “Зялёны бор”, “Налібокская пушча”. Дарэчы, дзіцячы адпачынак для сямейнага бюджэту – бясплатны. Аплачваць дарогу, страхоўку і іншыя паслугі давядзецца толькі тым, хто едзе адпачываць за межы краіны. Напрыклад, паездка ў санаторый “Беларусь” у Друскінінкай каштавала для бацькоў прыкладна 131 рубель. Бюджэту кошт адной дзіцячай пуцёўкі на 21 дзень у беларускі санаторый у сярэднім абышоўся ў 620 рублёў.

Дзяржава поўнасцю бярэ на сябе расходы і за санаторны адпачынак інвалідаў І і ІІ груп, ветэранаў вайны. У мінулым годзе  магчымасцю аздаравіцца бясплатна скарысталіся 23 такія жыхары Ляхавіцкага раёна. А, між тым, пуцёўка на 18 дзён каштавала летась 450-726 рублёў.

Не “кусаюцца” цэны на пуцёўкі і для працуючых грамадзян:  з 1 мая па 30 кастрычніка складаюць ад 20-ці працэнтаў сярэдняга заробку, а ў зімовыя месяцы і таго менш – ад 15-ці працэнтаў. 15-20 працэнтаў кошту пуцёўкі кампенсуюць і ветэраны працы. Калі жадаючых трапіць на санаторна-курортнае лячэнне больш, чым раёну выдзелена пуцёвак, апошнія заўсёды можна заказаць з поўнай аплатай непасрэдна ў санаторыі. Да таго ж, напрыклад, у здраўніцах Федэрацыі прафсаюзаў Беларусі прадугледжаны 25-працэнтныя скідкі для членаў прафсаюза. Напрыклад, на

18 дзён курсоўка ў папулярны санаторый “Буг” каштуе 772 рублі, калі вы член прафсаюза, з гэтай сумы вылічваецца 193 рублі – добрая эканомія ўласнага бюджэту.

Дапамагаюць грамадзянам набыць пуцёўкі ў санаторыі і прафілакторыі і прафсаюзныя пярвічкі.  Старшыня райкама прафсаюза работнікаў аграпрамысловага  комплексу  Ірына  Чура расказала, што ў мінулым годзе  84 работнікі сельгасарганізацый атрымалі датацыі на патанненне пуцёўкі ў санаторый для сябе ці ў летнік для сваіх дзяцей  на  агульную суму амаль 1200 рублёў.

Яшчэ некалькі месяцаў, і такія доўгачаканыя летнія канікулы прымуць у цёплыя абдымкі хлопчыкаў і дзяўчынак.  Хто на мора, хто ў падарожжа, а некаторыя рабяты з задавальненнем едуць аздаравіцца ў санаторыі, лагеры адпачынку. Многія юныя ляхавічане ўжо мараць пра чарговыя незабыўныя  дзянькі ў  любімым летніку “Чайка”,  які і сёлета  чарговы раз сустрэне рабят абноўленым. Камфортныя ўмовы для адпачынку,   свежае паветра, утульныя пакоі для пражывання, збалансаванае пяціразовае харчаванне.  А колькі цікавых конкурсаў, экскурсій, паходаў, гульняў ладзяць педагогі. Не дзіўна, што  за апошнія паўтара дзесяцігоддзя  ў кожнай змене – аншлаг адпачываючых.  Летась самыя яскравыя ўражанні з летніка каля Галаўнінцаў прывезлі дамоў больш за паўтысячы  хлопчыкаў  і дзяўчынак.  Такі ажыятаж тлумачыцца не толькі  цікавым і здаровым  адпачынкам, але і важкай дзяржаўнай датацыяй на аплату пуцёўкі: з агульнага кошту 315 рублёў 160 датавала дзяржава. Астатнюю суму дзялілі паміж сабой бацькі дзіцяці (32 рублі) і арганізацыя, дзе  адзін з іх працуе (123 рублі).

Для тых, хто любіць падарожнічаць, цікавіцца гісторыяй роднага краю, каму па душы сон у турыстычнай палатцы на беразе рэчкі ці на лясной паляне, не першы год дзейнічае  перасоўны лагер “Рабінзоны”. За такое задавальненне  бацькі  кожнага з 20 нашых юных землякоў заплацілі ўсяго  па 12 рублёў, астатнія  68 рублёў – бюджэтныя сродкі.

Цікавым быў адпачынак для 20 эрудытаў-школьнікаў   у аздараўленчым лагеры “Эўрыка” і  профільным абаронна-спартыўным “Выратавальнік” (арганізаваны  сумесна з РАНС),  дзе з карысцю бавілі час  20 рабят, якім падабаецца экстрым. Пры кошце пуцёўкі 84 рублі бацькоўская даплата склала 16 рублёў. Астатняе – зноў пастаралася дзяржава.

Працуюць і спартыўныя лагеры. Усе яны таксама  фінансуюцца ў сваёй большасці за дзяржаўны кошт.

Акрамя таго, па словах галоўнага бухгалтара аддзела адукацыі, спорту і турызму райвыканкама Вольгі Савасцюк, на базе  многіх школ раёна на канікулах працавалі лагеры з дзённым знаходжаннем, дзе адпачыла за  мінулы год амаль  тысяча гарадскіх і вясковых  хлопчыкаў і дзяўчынак. Асноўную частку расходаў зноў жа ўзяла на сябе дзяржава. Напрыклад, на леташніх асенніх канікулах амаль 150 хлопчыкаў і дзяўчынак з СШ № 2, Крывошынскай, Ліпскай, Начаўскай, Тухавіцкай сярэдніх школ і Малагарадзішчанскага вучэбна-педагагічнага комплексу прыходзілі ў гэтыя навучальныя ўстановы не вучыцца, а адпачываць. Кошт пуцёўкі ў лагер  на 6 дзён склаў 30  рублёў. Бацькі заплацілі менш за 9 рублёў, астатняя сума выдаткавана са сродкаў дзяржаўнага сацыяльнага страхавання.

Што датычыцца адпачынку дарослых, то  ў калектыўных дагаворах   многіх прадпрыемстваў, устаноў і арганізацый прадугледжана выплата  матэрыяльнай дапамогі да водпуску, а таксама іншыя  даплаты.