Рабіць дабро так проста
Навагоднія і калядныя святы — час, калі пануе атмасфера дабрыні, радасці, шчырасці. У кожнага з нас, незалежна ад узросту і сацыяльнага статуса, ёсць унікальная магчымасць зрабіць свята казачным, таямнічым і непаўторным. І гэта датычыцца не толькі блізкіх і родных, але і тых, каму дапамога асабліва неабходная — інвалідаў, малазабяспечаных людзей, дзяцей, якія засталіся без бацькоўскай апекі. Яны таксама чакаюць ад Новага году падарункаў, увагі і клопату. Зрабіць свята па-сапраўднаму радасным для іх у нашых сілах.
Ужо з першых момантаў дабрачыннай акцыі «Калядны падарунак» (праводзіцца па ініцыятыве цэнтра карэкцыйна-развіваючага навучання і рэабілітацыі і цэнтра дадатковай адукацыі дзяцей і моладзі), якая праходзіць з 21 снежня ў дзіцячым магазіне «Аліса» ў райцэнтры, знайшлося нямала жадаючых зрабіць падарунак выхаванцам ЦКРНіР і пацыентам дзіцячага аддзялення райбальніцы.
Напрыклад, 5-гадовая Улада Каралёва знаходзіцца зараз у дзіцячым аддзяленні бальніцы, яна прызнана маючай патрэбу ў сацыяльнай абароне па пастанове камісіі па справах непаўналетніх райвыканкама. Яе маці больш за ўсё любіць алкаголь… Яшчэ адна двухмесячная пацыентка аддзялення чакае канчатковага афармлення дакументаў на апякунства, а пакуль замест мамы і таты ў яе — медыцынскія работнікі…
Акцыя пычыналася па-сапраўднаму святочна. Каля ўваходу ў магазін усіх сустракаў Дзед Мароз, а непасрэдна ў памяшканні ў цэнтры ўвагі — незвычайная ёлка. На ёй замест упрыгожванняў развешаны выразаныя з паперы адбіткі дзіцячых далонек, на якіх — імя і прозвішча дзіцяці і яго просьбы да Дзеда Мароза. А мары пра навагоднія падарункі ў рабят сапраўды здзяйсняюцца. Так, Дзіма Тумаш папрасіў машынку, Галя Алейнікава — плюшавае цацачнае медзведзяня, Даша Пазнякова — касметыку, Ягор Шадура — салодкія пачастункі… Першым на акцыю адгукнуўся старшыня райвыканкама Дзмітрый Бурдук.
Звяртаючыся да прысутных, ён адзначыў, што гэта сапраўды высакародная місія — выканаць дзіцячае пераднавагодняе жаданне.
Хлопчыкі і дзяўчынкі вераць у навагоднія цуды, і абавязак дарослых зрабіць усё магчымае, каб мара стала рэальнасцю. Дзмітрый Міхайлавіч выканаў мару Улады Каралёвай, якая знаходзіцца зараз у бальніцы, і купіў для яе ляльку і салодкі падарунак. Начальнік аддзела адукацыі райвыканкама Святлана Юрлевіч асабіста ад сябе падарыла Паўлу Мацюшэнку машынку, і яшчэ шмат падарункаў для рабят ад раённай арга-нізацыі ГА «Белая Русь». Не засталася ўбаку ад акцыі і рэдакцыя «ЛВ». Галоўны рэдактар раёнкі Вольга Барадзіна па жаданні Ксюшы Пашкевіч набыла мазаіку, а для іншых дзяцей – альбомы і каляровыя алоўкі. Да высакароднай місіі далучыліся і ляхавічанкі Наталля Лісай, Зоя Гатоўчыц, работнікі аддзела адукацыі, ЦКРНі Р, цэнтра дадатковай адукацыі і многія іншыя неабыякавыя і добразычлівыя людзі, якія не дзеляць дзяцей на сваіх і чужых, а гатовы дапамагчы і падтрымаць іншых.
Ужо нават першы дзень акцыі паказаў, што сярод нас такіх шмат – было куплена разнастайных падарункаў і тавараў для дзяцей больш як на мільён рублёў.
Акцыя “Калядны падарунак” у магазіне “Аліса” прадоўжыцца да 30 снежня.
Дарэчы, у панядзелак, 26 снежня, з 8 да 14 гадзін адзін з этапаў яе завітае ў фае Дома Саветаў. Зрабіце яшчэ адзін крок насустрач дабрыні. І шчырая дзіцячая ўсмешка будзе самай лепшай падзякай за атрыманы падарунак. Сапраўды, рабіць дабро – так проста і так прыемна.
Галіна КАНЬКО