Тут праполка, там касьба
Асноўныя майскія клопаты аграрыяў зноў у полі. З кожным днём усё гучней нагадвае пра сябе касавіца. Ад колькасці назапашаных кармоў залежаць прывагі і надоі статка. У кампанію ўключыліся ўсе сельгаспрадпрыемствы раёна. Некаторыя, напрыклад, КСУП «Тальмінавічы» і «Востраў-Агра», аб’ядналі свае намаганні, тэхніку і лю- дзей – стварылі агульны касавічны атрад, які працуе пачаргова ў кожнай з гэтых гаспадарак.
Выконваючы абавязкі начальніка райсельгасхарчу Ігар Яварчук расказаў, што сёлета ў ААТ «Жарабковічы», «Шлях новы», «Ляхавіцкі райаграсэрвіс», ДП «Нача», ЗАТ «Белпрампрыбор» будуць пабудаваны дадаткова 14 сянажна-сіласных траншэй.
Не касавіцай адзінай жывуць сельгасугоддзі. На парадку дня яшчэ адна тэрміновая работа – хімпраполка яравых культур, кукурузы, цукровых буракоў. Тры сельгаспрадпрыемствы пачалі апрацоўку пасеваў цукровых буракоў. «Жарабковічы» набылі неабходныя прэпараты за ўласныя сродкі, «Шлях новы» і райаграсэрвіс – з дапамогай Жабінкаўскага цукровага завода. А вось тэхніка для гэтых мэт у кожнага свая і ў неабходнай колькасці.
З ядахімікатамі для праполкі кукурузы аграрыям раёна дапамагае бюджэт. Частку прэпаратаў гаспадаркі атрымліваюць праз «Брэстаблаграсэрвіс», частку набываюць самастойна. Дарэчы, дапамога аказваецца толькі тым, хто сеяў беларускім насеннем.
Галіна ЗАРЭЧНАЯ.