Справаздачна-выбарны сход прайшоў у СВК «Ордэна «Знак Пашаны» Кастрычнік»
19 студзеня для СВК «Ордэна «Знак Пашаны» Кастрычнік» стаў днём лёсавызначальным. Ішла сур’ёзная размова пра тое, якім чынам будзе развівацца гаспадарка сёння, заўтра і ў бліжэйшай будучыні. Рашэнне па гэтых пытаннях павінен быў прыняць сход, на якім прысутнічалі, акрамя кіраўніцтва сельгаскааператыва, галоўных спецыялістаў, сённяшніх працаўнікоў, ветэранаў, старшыня раённага выканаўчага камітэта Дзмітрый Бурдук і яго намеснік Мікалай Варажун.
Агучыўшы парадак дня, старшыня гаспадаркі Васілій Чубаў выступіў са справаздачай аб выніках работы за 2012 год і акрэсліў задачы на год бягучы.
Кааператыў — адзін з моцных сераднякоў. Так, у мінулым годзе пры сярэдняй ураджайнасці 50 цэнтнераў з гектара тутэйшыя раслінаводы сабралі 5147 тон зерня ў бункернай вазе, што на 1697 тон больш, чым на жніве-2011. Са станоўчага боку адзначана і работа па корманарыхтоўках — на ўмоўную галаву нарыхтавана 42 цэнтнеры кармавых адзінак. З увагай у мінулым годзе аднесліся і да вырошчвання важнай і значнай культуры — кукурузы, пад яе было адведзена 500 гектараў плошчаў, выканалі ўсе належныя агратэхнічныя патрабаванні, і вынік не прымусіў сябе чакаць: атрымалі па 386 цэнтнераў на круг.
Вытворчасць малака — адзін з моцных бакоў СВК. У 2012 годзе ў сярэднім на кожную карову надоена па 5352 кілаграмы малака. Лепшы паказчык па МТФ «Галавачы» — па 5546 кілаграмаў ад кожнай каровы. Лідары сярод аператараў машыннага даення Марыя Турко і Тамара Пятруцый, якія надаілі ад кожнай буронкі адпаведна па 6621 і 5897 кілаграмаў малака. Былі агучаны і іншыя станоўчыя вынікі работы ва ўсіх падраздзяленнях.
Спыніўся дакладчык на рабоце цэха механізацыі, рэканструкцыі МТФ «Зубелевічы», будаўніцтве новага зернесушыльнага комплексу. Узняў старшыня кадравае пытанне, гаварыў пра заработную плату і іншае.
Пра плюсы і мінусы ў рабоце сваіх падраздзяленняў узгадвалі галоўны заатэхнік Віктар Грыцкевіч, галоўны інжынер Вячаслаў Берташ, галоўны аграном Іван Туцін.
Пра тое, якім быў мінулы год для працаўнікоў АПК Ляхавіччыны, і як на агульным фоне выглядае СВК «Кастрычнік» расказаў начальнік райсельгасхарчу Мікалай Варажун. Старшыня райвыканкама Дзмітрый Бурдук, разважаючы пра вытворчыя паказчыкі, падкрэсліў, што справы ў «Кастрычніку» далёка не горшыя, але адзначыў, што крытычныя заўвагі робяцца не дзеля лічбаў, а каб знайсці найбольш аптымальныя шляхі да вырашэння праблем, працаваць так, каб вынік быў больш паспяховым. Для гэтага неабходна, у першую чаргу, узмацніць вытворчую і кадравую дысцыпліну, адказнасць кожнага на сваім участку.
— Само жыццё дыктуе, што ў кожнай сферы, у тым ліку і ў сельскай гаспадарцы, неабходна працаваць па новых тэхналогіях, не забываць пра мадэрнізацыю і належнае кадравае забеспячэнне, — сказаў кіраўнік раёна.
Прысутныя ўважліва слухалі кожнага з выступаючых, з многімі меркаваннямі згаджаліся, з некаторымі — не зусім. Аднак, без перабольшвання, усе, хто прысутнічаў гэтым суботнім днём у зале Конькаўскага СДК, чакалі, як вырашыцца адно з галоўных пытанняў, якое ў многім вызначыць заўтрашні дзень для мясцовых сельгасвытворцаў. Размова ішла пра магчымасць аб’яднання СВК «Ордэна «Знак Пашаны» Кастрычнік» і СВК «Шлях новы».
Дзмітрый Бурдук падкрэсліў, што многія праблемы сённяшняга «Кастрычніка» з-за недахопу ўласных грашовых сродкаў, а аб’яд наўшыся, можна разлічваць на большыя фінансавыя паступленні, што дасць магчымасць рэканструяваць старыя і будаваць новыя фермы, набываць новую тэхніку, умацоўваць кадравы патэнцыял.
— Гэта будзе аб’яднанне на роўных. І буйное сельгаспрадпрыемства здольна развівацца, а не стаяць на адным месцы, — адзначыў старшыня райвыканкама.
Пра гэта гаварыў і Васілій Чубаў:
— Далучэнне адной гаспадаркі да другой — узаемавыгаднае аб’яднанне. І калі не рашыцца на гэты важны і адказны крок цяпер, то потым можа быць і позна…
Напал эмоцый у зале ўзрастаў. І, затаіўшы дыханне, пакуль яшчэ «кастрычнікаўцы», слухалі старшыню СВК «Шлях новы» Аляксандра Вашчука, які расказаў пра дасягненні сваёй гаспадаркі (адной з лепшых ў раёне і не толькі), пра сярэднюю заработную плату ў розных падраздзяленнях — значна вышэйшую за тую, якая сёння ёсць у «Кастрычніку», пра сацыяльныя гарантыі (дарэчы, пасля магчымага аб’яднання яны будуць распаўсюджвацца і на сённяшніх працаўнікоў і пенсіянераў «Кастрычніка»).
— Аб’яднаўшыся, разам будзем рухацца наперад. Без усялякага падзелу на сваіх і чужых. Будзем працаваць на агульны вынік — паляпшэнне жыцця і дабрабыту ўсіх працаўнікоў, рост заработнай платы і г.д., — запэўніў Аляксандр Вашчук.
І вось адказны момант — галасаванне. Усе без выключэння ўдзельнікі сходу прагаласавалі за аб’яднанне.
Цяпер аналагічны сход чакаецца ў «Шляху новым», а потым пройдзе агульны — ўпаўнаважаных з абодвух сельгаспрадпрыемстваў, дзе будзе зацверджана назва аб’яднанай гаспадаркі і выбраны старшыня.
Нямала на справаздачным сходзе было прыемных момантаў. Ганаровую грамату раённага выканаўчага камітэта Дзмітрый Бурдук уручыў Васілію Чубаву, які 35 гадоў адпрацаваў у гаспадарцы, з іх 19 — у якасці старшыні. Грашовыя прэміі атрымалі працаўнікі-юбіляры. Былі таксама названы пераможцы конкурсу «Лепшы па прафесіі» па выніках мінулага года.
Сход завяршыўся на пазітыўнай ноце. І пераважная большасць вяскоўцаў разыходзілася па дамах, цвёрда ўсведамляючы, што ўсё будзе добра. Працаваць яны жадаюць і ўмеюць самааддана, а гэта — адна з галоўных умоў поспеху.
Галіна КАНЬКО.
Фота Сяргея ВАРАНОВІЧА.