Ляховичи: на новогоднее представление были приглашены самые активные ребята района
«Казка ля ёлкі»
”Тайну старога люстэрка” раскрылі на раённым навагоднім прадстаўленні больш як 100 хлопчыкаў і дзяўчынак.
Лепшыя з лепшых вучні едуць на галоўную ёлку раёна! Гэта паведамленне абляцела ўсе школы, і рабяты ведалі, што білетам у гэтую навагоднюю казку з’яўляецца выдатная вучоба, актыўны ўдзел у грамадскім жыцці, перамогі на прадметных алімпіядах і ў спартыўных спаборніцтвах. Свята ладзілася ў зале ГДК. Многія апранулі маскарадныя ўбранні, дзяўчынкі – бальныя сукенкі, старэйшыя хлопчыкі – строгія касцюмы. І ўсе ў чаканні, што адбудзецца навагодні цуд, як водзіцца…
Ён пачаўся з выступлення старшыні райвыканкама Вячаслава Сельмановіча, які шчыра віншаваў рабят, дзякаваў за іх поспехі, пажадаў новых перамог, выдатных адзнак, спаўнення задуманага. І “загадаў”, каб Дзед Мароз кожнаму ўдзельніку балю выдаў з казачных скарбаў падарункі.
А потым казачнае дзейства пачалося на сцэне, дакладней, у зале. “Дабро перамагло зло”, і навагодні сюжэт працягваўся ўжо ля прыгажуні-ёлкі: карагоды, песні, пляскі, вершы дарылі дзеці Дзеду Марозу і Снягурачцы, а ў адказ атрымлівалі пачастункі і падарункі. Такое ўражанне, што не толькі малодшыя ўдзельнікі прадстаўлення, але і старэйшыя шчыра верылі ў навагоднія цуды. Вось яны і збыліся. Дзякуючы за гэта творчым работнікам цэнтра дадатковай адукацыі дзяцей і моладзі, культуры.
Напярэдадні Новага года казачныя ранішнікі і балі-маскарады праходзяць паўсюдна. Ні адно дзіця не застанецца без віншаванняў і падарункаў. Як расказала старшыня раённай арганізацыі Чырвонага Крыжа Жанна Лешык, валанцёры СШ № 2 г. Ляхавічы сабралі грошы, купілі падарункі і наведаліся дамоў да дзяцей-інвалідаў. Дабрачынную ёлку правялі валанцёры і для інвалідаў дзённага знаходжання тэрытарыяльнага цэнтра сацыяльнага абслугоўвання насельніцтва.
Падрыхтавала і перадала праз арганізацыю Чырвонага Крыжа 87 падарункаў для дзяцей-інвалідаў з Ляхавіччыны жыхарка Чэхіі. Яна не захацела называць сваё імя, проста зрабіла дабро, бо гэта так прыемна…
Тое, што пад Новы год чакаюць цуда не толькі дзеці, але і дарослыя, сведчыць і яшчэ адно мерапрыемства, якое адбылося ў тэрытарыяльным цэнтры сацыяльнага абслугоўвання насельніцтва. Сапраўдны баль-маскарад ладзілі людзі пенсіённага ўзросту. На свята прыйшлі мушкецёры, піраты, доктар Айбаліт, прыгажуня-Вясна і матухна-Зіма, нават вясёлы “цыганскі табар”. Пасля імправізаванага прадстаўлення, якое нікога не пакінула раўнадушным, пажылыя ўдзельнікі свята сабраліся за кубачкам кавы…
Бываюць цуды пад Новы год!
Аліна ЛАПІЧ.
Фота Сяргея ВАРАНОВІЧА.
