Бусел прызямліўся ў райцэнтры

Летась бусел прылятаў на Ляхавіччыну  267  разоў – менавіта столькі пасведчанняў аб нараджэнні выдадзена  бацькам нашых маленькіх землякоў. А гэта на 27 больш, чым у пазамінулым годзе.

Аптымістычныя лічбы  пацвярджаюць, у тым ліку, і  ўпэўненасць   нашых землякоў  у заўтрашнім дні.  Дзяржава аказвае сем’ям сур’ёзную матэрыяльную дапамогу пры нараджэнні і выхаванні дзяцей. Асаблівая ўвага  – мнагадзетным сем’ям. Пры нараджэнні трэцяга і наступных дзяцей яны маюць права на назначэнне сямейнага капіталу,  важкую падтрымку ў вырашэнні жыллёвага пытання і г.д.

Такі клопат дзяржавы прыносіць свой плён. У  40 сем’ях у раёне ў 2015-ым на свет з’явілася трэцяе дзіця, у 15 – чацвёртае, а ў  6  сем’ях –  пятае. Першынцы нарадзіліся ў 100 сем’ях. Перавага на Ляхавіччыне летась засталася за  прыгожай паловай чалавецтва. Сярод нованароджаных 141 дзяўчынка – на 15 больш, чым хлопчыкаў.   Дарэчы, такая “прыго-жая” няроўнасць у раёне адзначаецца ўпершыню за апошняе дзесяцігоддзе, расказала начальнік аддзела загса райвыканкама Людміла Палтарак.

А вось сёлета чараду шчаслівых падзей адкрылі хлопчыкі – немаўляты  Кірыл і Арцём. На пяты дзень 2016 года ў аддзеле загса былі складзены запісы акта аб нараджэнні № 1 і № 2.

Як адзначыла начальнік аддзела загса, сярэдні  ўзрост  матуль – 26 гадоў, татаў – 29.  Але і  пасля 45 гадоў бацькоўства  не закрытая тэма.

Самыя  распаўсюджаныя імёны дзяўчынак  у нашым раёне летась  – Соф’я і Сафія, Вікторыя, Аляксандра  і Паліна. Адзінкавыя – Агата, Алёна, Бэла, Эміліяна, Ліяна, Злата, Аліса і іншыя. У хлопчыкаў у лідарах Максімы, Аляксандры, Мацвеі, Арцёмы і Міхаілы.  Сярод рэдкіх імёнаў –   Архіп, Сцяпан, Міраслаў, Даніэль, Антон.