Класная работа. У школы Ляхавіччыны сёлета прыйшлі працаваць 12 маладых спецыялістаў з педагагічнай адукацыяй
Дыплом (у кагосьці і чырвоны) у кішэні, і маладыя спецыялісты гатовы пакараць новыя вяршыні, рабіць кар’еру, станавіцца па-сапраўднаму самастойнымі. У жніўні яны традыцыйна прыходзяць на сваё першае працоўнае месца. Яшчэ тыдзень-другі і школьны званок пакліча на ўрок дзяцей і настаўнікаў. Сёлета на Ляхавіччыне 12 навічкоў – выпускнікоў сярэдніх спецыяльных і вышэйшых навучальных устаноў.
Гарачыя дзянькі цяпер у галоўнага спецыяліста аддзела адукацыі, спорту і турызму райвыканкама Таццяны Зубік. Трэба паспець праверыць і аформіць усе дакументы, улічыць інтарэсы і маладых спецыялістаў з улікам іх кваліфікацыі, і навучальных устаноў. Гімназія, гарадскія школы, Жарабковіцкая, Ліпская, Тухавіцкая, Крывошынская СШ, Падлескі ДС-СШ гатовы да сустрэчы з настаўніцкім папаўненнем. У гэтыя навучальныя ўстановы прыйшлі фізікі, матэматыкі, настаўнікі фізкультуры і англійскай мовы, пачатковых класаў, сацыяльныя педагогі, выхавальнікі. 10 закончылі педагагічныя ВНУ. У кожнага з іх была свая матывацыя, каб атрымаць настаўніцкую прафесію. Кагосьці натхніў прыклад любімага настаўніка, іншы прадаўжае сямейную дынастыю, бачыць у прафесіі сваё прызванне, з дзяцінства марыў пра яе.
Безумоўна, важную ролю адыгрывае і тое, што апошнім часам у краіне робіцца многае, каб павысіць прэстыж педагагічнай прафесіі. Пра неабходнасць павышэння статуса настаўніка гаварыў Прэзідэнт Рэспублікі Беларусь Аляксандр Лукашэнка, калі заслухоўваў даклад пра ход прыёмнай кампаніі і падрыхтоўкі сістэмы адукацыі да новага 2016/2017 навучальнага года. Роля настаўніка ў жыцці грамадства, далейшае ўдасканаленне сістэмы адукацыі ў краіне – пытанні, якія ўздымаліся і на пятым Усебеларускім народным сходзе.
Выпускніца Баранавіцкага дзяржаўнага ўніверсітэта Надзея Жыдовіч, па яе ўласным прызнанні, не можа дачакацца, калі, у рэшце рэшт, прыйдзе ў клас не практыканткай, а настаўніцай. Перш чым размеркавацца ў Ляхавічы дзяўчына ( родам з Дзяржынска) прыехала ў наш горад, які ёй вельмі спадабаўся. А пасля сустрэчы і размовы з дырэктарам СШ № 1 канчаткова вырашыла: працаваць тут і толькі тут. Надзея верыць, што ўсё павінна атрымацца: нездарма карпела над падручнікамі, вывучала дадатковую літаратуру. Вельмі спадзяецца на дапамогу, падтрымку больш вопытных настаўнікаў. Дарэчы, вырашаецца і жыллёвае пытанне.
Некалькі хвілін ад дома – і выхавальнік дзіцячага сада і па сумяшчальніцтве настаўніца інтэграванага класа Анастасія Шахмуць пераступае парог Падлескага ДС-БШ. Яна ў штаце тутэйшых педработнікаў з 13 жніўня.
Выпускніца ляхавіцкай гімназіі калісьці павезла падаваць дакументы ў Пінскі медкаледж, але па дарозе перадумала і стала навучэнкай педагагічнага каледжа імя А.С. Пушкіна. Вучылася на настаўніка пачатковых класаў з ахвотай і інтарэсам. Паспела без адрыву ад вучобы замуж пайсці, дачку нарадзіць. Пакуль маладая мама пісала канспекты, слухала лекцыі, у дэкрэтным водпуску быў бацька. Насця гаворыць, што невядома як справіліся б у матэрыяльным плане, каб не дапамога сваякоў мужа, сама дзяўчына – сірата.
– На асноўную практыку прыехала ў аграгарадок Падлессе. Як душэўна і добра тут да мяне аднесліся! Асабліва дапамагала метадыст-настаўнік Таццяна Мікалаеўна Таранда. А колькі слушных парад атрымала ад завуча Наталлі Міхайлаўны Усенка! – успамінае пра знаёмства з Падлескім ДС-БШ Анастасія Шахмуць.
Зараз маладая сям’я будуе ўласную кватэру і з нецярпеннем чакае наваселля.
– Не церпіцца працаваць самастойна. Канешне, крыху хвалююся, бо давядзецца амаль на цэлы дзень замяніць сваім маленькім выхаванцам маму – гэта такая вялікая адказнасць – дзеліцца Анастасія, у планах якой вышэйшая адукацыя.
Не толькі дзяўчаты выбіраюць справай жыцця настаўніцтва. Хаця і ў меншай колькасці, але педагагічную сям’ю папаўняюць прадстаўнікі моцнай паловы.
– Добрай раніцы, рабяты! Мяне завуць Уладзіслаў Уладзіміравіч. Я буду выкладаць у вас фізіку, – так малады педагог збіраецца пачаць сваё знаёмства з вучнямі СШ № 1. Гэта ўстанова адукацыі стала для Уладзіслава Мейлаха, як і для настаўніцы замежнай мовы Надзеі Жыдовіч, настаўніка матэматыкі Сяргея Яновіча, першым месцам працы.
На размеркаванні ў Брэсцкім дзяржаўным універсітэце імя А.С Пушкіна ў юнака, які родам з Жабінкі, быў выбар паміж Столінам і Ляхавічамі. Выбраў наш райцэнтр.
Энергіі і энтузіязму ў маладога папаўнення хапае. Але акрамя маральнага стымулявання, не менш важна і матэрыяльнае заахвочванне. Пытанне на кантролі ўлады. Каб ведаць патрэбы і праблемы маладых кадраў, старшыня райвыканкама Вячаслаў Сельмановіч штогод сустракаецца з маладымі спецыялістамі. Нямала гарантый для тых, хто па размеркаванні прыйшоў на першае працоўнае месца занатавана ў калектыўных дагаворах арганізацый. Па словах старшыні райкама прафсаюза работнікаў адукацыі і навукі Святланы Бялецкай, кожны малады спецыяліст атрымаў прадугледжаныя заканадаўствам “пад’ёмныя”, таксама пасля заключэння кантракта штомесяц на працягу трох гадоў можа разлічваць на 10-працэнтную прыбаўку за складанасць, напружанасць працы; павышэнне тарыфнай стаўкі не ніжэй як на 20 працэнтаў. Акрамя таго, часткова кампенсуюцца пры наяўнасці дагавора найму і расходы на арэнду жылля.
Згодна раённага галіновага сацыяльнага пагаднення паміж аддзелам адукацыі, спорту і турызму райвыканкама і райкама галіновага прафсаюза, калектыўнага дагавора паміж адміністрацыяй навучальнай установы і прафкамам, маладыя педагогі, з якімі пасля абавязковай адпрацоўкі заключаны кантракт тэрмінам не менш за 3 гады, атрымліваюць аднаразовую выплату ў памеры не менш 5 базавых велічынь.
Галіна КАНЬКО.
