Агонь трымайце пад кантролем

Выпальванні могуць стаць прычынай маштабных пажараў у лясах і на тарфяніках, узгаранняў жылых дамоў, гаспадарчых пабудоў, траўміравання і гібелі людзей. І хаця ў Беларусі выпальванне сухой расліннасці забаронена законам, жаданне развесці агонь у нашых грамадзян не знікае.

Работнікі РАНС практычна кожны дзень праводзяць рэйды па вёсках і аграгарадках,  а таксама дачных садаводчых таварыствах, гутараць з насельніцтвам пра неабходнасць выканання правілаў пажарнай бяспекі. Днямі інспектар інспекцыі нагляду і прафілактыкі РАНС Аляксей Клетаніца пабываў у садаводчым таварыстве “Незабудка” на тэрыторыі Конькаўскага сельсавета,  нагадаў дачнікам правілы пажарнай бяспекі пры спальванні смецця на прысядзібнай тэрыторыі, акцэнтаваў увагу на строгай забароне выпальвання сухой расліннасці.

Нярэдка ў садаводчых таварыствах і вёсках можна натрапіць на ўчасткі, зарослыя пустазеллем, заваленыя бураломам. Ляхавіцкі РАНС сумесна з сельвыканкамамі праводзіць актыўную работу па пошуку ўладальнікаў такіх участкаў для прыняцця мер па навядзенні парадку на тэрыторыі.

Сельвыканкамы і кіраўнікі арганізацый і прадпрыемстваў павінны забяспечыць  падтрымку ў пажаранебяспечным стане населеных пунктаў, аб’ектаў і тэрыторый, якія да іх прылягаюць. Своечасовая ўборка сухой расліннасці на сельска-гаспадарчых угоддзях  – задача злабадзённая.

Выкананне правілаў бяспекі на тарфяніках (іх у раёне налічваецца 9), замацаваных за сельгасарганізацыямі раёна, –  пад асаблівай увагай.

Развядзенне кастроў на прысядзібных участках дазва-ляецца пры выкананні наступных умоў: пастаянны кантроль, забеспячэнне сродкамі пажаратушэння (ёмістасць з вадой, лапата), адлегласць ад будынкаў – 10 метраў, ляснога масіву – 20, сціртаў саломы і сена – 30. Забараняецца разводзіць кастры пад дрэвамі, а таксама ў ветранае надвор’е. На тэрыторыі ля жылых дамоў прысядзібнай забудовы, дачных і садовых домікаў дапускаецца прыгатаванне ежы ў спецыяльных прыстасаваннях з выкарыстаннем  вугалю, які гарыць (мангала, барбекю, грыля і інш.), пры гэтым мінімальная адлегласць да будынкаў і збудаванняў павінна быць не менш за 4 метры.

За выпальванне сухой расліннасці, травы на корані, а таксама ржышча і пажніўных рэшткаў на палях ці за непрыняцце мер па ліквідацыі выпальванняў прадугледжана адміністрацыйнай адказнасць у выглядзе штрафу ад 10 да 40 БВ, а за распальванне кастроў у забароненых месцах – папярэджанне ці накладанне штрафу да 12 БВ. Да адміністрацыйнай адказнасці прыцягваюцца не толькі асобы, якія выпальваюць траву, але і кіраўнікі арганізацый, дзе не прывялі ў парадак замацаваныя тэрыторыі і не прынялі меры па тушэнні выпальванняў.

Пры ўзгаранні неабходна неад-кладна паведаміць у пажарную службу па тэлефоне 101 ці 112.