Ягадка да ягадкі. Сезон нарыхтовак у разгары. Але варта памятаць, што збіраць дары лесу трэба без парушэння прыродаахоўнага заканадаўства
Гэтым часам асабліва дбайныя не толькі робяць нарыхтоўкі садавіны-агародніны на зіму, але маюць на гэтым хоць і невялікую, але прыбаўку да сямейнага бюджэту.
Для тых, у каго ёсць лішак вітаміннай прадукцыі з уласнага падвор’я ці магчымасць і жаданне сабраць для продажу дары лесу, райпо днямі адкрыла каля свайго адміністрацыйнага будынка нарыхтоўчы пункт (раней там быў магазін “Шпалеры”). Там прымаюць чорную і чырвоную парэчкі па цане адпаведна 40 і 20 капеек за кілаграм, па 50 капеек вішню, чарніцы (1 рубель 8 капеек).
Для мясцовага спажыўтаварыства ліпень – дадатковая магчымасць зарабіць грошы: прапанаваць прымальныя ўмовы закупкі і шукаць рынкі выгаднага збыту плодаагародніннай прадукцыі. Начальнік аддзела нарыхтовак райпо Віктар Скіндзер расказаў, што заключаны дагавор на пастаўку парэчак на вінзавод “Колас”, што ў Слуцкім раёне.
У месцах, ураджайных на чарніцы (Гайнінец, Крывошын, Ліпск, Свяціца, Заполле), дзейнічаюць закупачныя пункты. Сабраны на сёння “кошычак” умяшчальнасцю больш за 3,5 тоны, райпо пры добрым раскладзе плануе павялічыць разоў у 10. Частка ягады пойдзе на экспарт, частка будзе замарожана для продажу ў гандлёвай сетцы раёна. Зараз свежыя чарніцы можна купіць у некаторых магазінах райпо і на рынку.
На жаль, і гэта відаць на здымку, чарніцы часам збіраюцца з дапамогай так званых камбайнаў – забароненымі прыродаахоўным заканадаўствам спосабамі. Нарыхтоўшчык не можа не бачыць, якую ягаду яму прапануюць. Мяркую, ”браканьерская” для закупу не падыходзіць. Яна – тэма для прыродаахоўнай інспекцыі. Дарэчы, там напомнілі, што прымяненне забароненых сродкаў і метадаў збору дзікарослых ягад вядзе да накладання штрафу ў памеры да 20 базавых велічынь.
Вяскоўцы могуць здаць садавіну-агародніну ці лясныя дары ў мясцовыя магазіны спажыўкааперацыі.
Наперадзе яблычны і грыбны сезоны. Райпо неабходна назапасіць 2, 5 тоны грыбоў, 300 тон бульбы, 85 тон таматаў, 200 тон агуркоў і многае іншае. 100 тон з закупленых агуркоў райпо прадала кансерваваму заводу, а ён, у сваю чаргу, “аформіў” іх у слоікі. Эканаміст прадпрыемства Валянціна Слаута расказала, што кансервацыя працягваецца. На ўласнай прысядзібнай гаспадарцы зрэзалі і перапрацавалі 125 тон шчаўя. Тыдні праз два падыдзе чарга кабачкоў.
Наталля ПЕРАПЕЧКА.
Фота Сяргея ВАРАНОВІЧА.