Крымінал. Здарэнні Ляхавіччыны
У жыхара вёскі Літва падчас вобыску знойдзена макавая саломка вагой амаль 164 грамы. Раённы аддзел Следчага камітэта ўзбудзіў крымінальную справу.
Ранішняя бойка
Што не падзялілі паміж сабой два жыхары Баранавічаў у 5 гадзін раніцы на вуліцы Дзесюкевіча ў Ляхавічах, высвятляюць праваахоўныя органы. З заявай у міліцыю звярнуўся адзін з удзельнікаў бойкі.
Злодзей аказаўся земляком
РАСК узбудзіў крымінальную справу па факце крадзяжу інструментаў і будаўнічых матэрыялаў у адным з дамоў у вёсцы Стараселле. Усяго з дома ўкрадзена даб-ра на 3,7 мільёна рублёў. Устаноўлены злодзей – мясцовы жыхар, раней судзімы за аналагічнае злачынства.
Ніяк не сябруе з законам 24-гадовы мужчына з Заліпення. Нядаўна ён быў асуджаны да пакарання ў выглядзе грамадскіх работ тэрмінам на 200 гадзін. Але ўрок не пайшоў на карысць. За час выпраўленчых работ злодзей украў у суседнім Ліпску мапед.
За самагон – штраф
Апошнім часам крымінальныя зводкі не абыходзяцца без паведамленняў пра выяўленне чарговых фактаў вырабу, захоўвання і продажу алкагольнай прадукцыі. Так, напачатку лютага адміністрацыйны пратакол складзены на жыхара аграгарадка Нача, які дома захоўваў 26 літраў брагі. Атрымалі штраф за выраб самагону жыхары Навасёлак і Малога Падлесся.
Адзначыліся…
За апошнюю дзесяцідзёнку ў РАУС дастаўлена 9 сямейных скандалістаў, 20 грамадзян, якія знаходзіліся ў грамадскіх месцах у нецвярозым стане, а таксама 9 жыхароў раёна, якія ўчынілі дробныя крадзяжы.
Са зводкамі РАУС знаёмілася Галіна КАНЬКО.