Шмат травы – гаспадар удалы. У Ляхавіцкім раёне сезон корманарыхтовак на фінішнай прамой

●У Ляхавіцкім раёне сезон корманарыхтовак на фінішнай прамой – каля 90 працэнтаў запланаванага ўжо скошана

Першатраўе ў гэтам годзе не самае цудоўнае ў параўнанні з леташнім травастоем. Затое інтэнсіўнасць корманарыхтоўчых работ у раёне значна большая. Першая касьба шматгадовых траў у раёне гатова ўжо выйсці на фінішны круг.

Каля 90 працэнтаў шматгадовых угоддзяў раёна скошана. Абсалютна пераважная частка пракосаў даведзена да ладу па паказчыку вільготнасці і належным чынам уладкавана: закладзена ў сянажныя траншэі, загорнута ў прэс-плёнку, нязначная частка травы стала сенам.
Сенам становіцца толькі тая частка скошанай травы, якую не атрымалася прыстасаваць пад сянаж, напрыклад, калі перасохла. Гэта зусім нязначная частка скошанага. Пры сезонным плане сенанарыхтовак у 5 600 тон, у сенасховішчах гаспадарак іх знаходзіцца ўсяго каля сотні. У «Ліпнянцы» – 50, «Белазем’і» – каля двух дзясяткаў, у «Жарабковічах» нязначна больш за дзясятак.

А вось маса ўжо нарыхтаваных сянажных закладак па стане на
7 чэрвеня ў ААТ «Жарабковічы» складае каля 10 тысяч тон.
«Веснікаўцы» пабывалі на трава-ўборачным палетку, папрысутнічалі на закрыцці адной і закладцы іншых сянажных траншэй.
– Травы ў гэтым годзе некалькі саступаюць мінулагоднім. Майскія прымаразкі, працяглая адсутнасць дажджоў не дазволілі шматгадовым раскрыцца ў поўнай меры. Ва ўмовах недахопу вільгаці найбольш пацярпелі травы злакавай групы. Люцэрна выйшла больш-менш нядрэннай, – гаворыць кіраўнік вытворчага ўчастка № 2 ААТ «Жарабковічы» Іван Пірштук.

Завяршаюцца работы на чарговай сянажнай траншэі гаспадаркі. Некалькі часу назад яна была пад завязку запоўнена сянажнай масай. Каля дзвюх гадзін заняла фінішная даўтрамбоўка – і вось ён, момант тэхналагічнай ісціны. Работнікі зацягваюць паверхню поліэтыленавай плёнкай.

Другім участкам корманарых-тоўчых работ гэтага вытворчага ўчастка ААТ «Жарабковічы» будзем лічыць палетак шмагадовых траў. Яшчэ ўчора ён буяў люцэрнай, пра якую сёння нагадвае толькі акуратнае, але пажоўклае ржышча. Камбайнам-падборшчыкам кіруе ас у механізатарскай справе Анатолій Чаркас.
Трэцяй на шляху корманарыхтоўчай лакацыяй ААТ «Жарабковічы» стала яшчэ адна сянажная траншэя. Тут прымалі сыравіну з травяных палёў. Перавозчыкі здробненай травяной масы – трактары, а таксама МАЗы – прыбывалі па роўным графіку.

Іван КАВАЛЕНКА.
Фота Сяргея ВАРАНОВІЧА.