Прызыў у штатным рэжыме. У мінулым годзе прызыўную камісію прайшлі больш за 230 жыхароў Ляхавіцкага раёна
Пра вынікі прызыву грамадзян на тэрміновую ваенную службу, службу ў рэзерве ў 2024 годзе расказаў начальнік адасобленай групы Ляхавіцкага раёна ваеннага камісарыята горада Баранавічы, Баранавіцкага і Ляхавіцкага раёнаў Арцём Кірута.
Сярод асноўных задач па вучэбна-прызыўной рабоце ваенкам назваў правядзенне мерапрыемстваў па першапачатковым прыёме грамадзян на воінскі ўлік; непасрэднае вядзенне воінскага ўліку; арганізацыю і правядзенне прызыву грамадзян на тэрміновую службу і службу ў рэзерве; правядзенне мерапрыемстваў па падрыхтоўцы навучэнцаў для далейшай вучобы па ваенна-тэхнічных спецыяльнасцях.
У мінулым годзе прызыўную камісію прайшлі больш за 230 жыхароў Ляхавіччыны, прынята рашэнне аб прызыве каля 90 юнакоў на тэрміновую ваенную службу і службу ў рэзерве, па стане здароўя ў запас залічана 20 чалавек. Прадастаўлена каля
140 адтэрміновак па розных прычынах, з якіх амаль 100 – для прадаўжэння адукацыі, 7 – па стане здароўя. Арцём Кірута падкрэсліў, што паказчык годнасці грамадзян, якія належаць прызыву на тэрміновую ваенную службу, службу ў рэзерве, у Ляхавіцкім раёне застаецца на высокім узроўні – больш за 75 працэнтаў ад усіх прызыўнікоў, накіраваных на медыцынскі агляд, прызнаюцца годнымі для праходжання тэрміновай армейскай службы.
Таксама Арцём Кірута расказаў, дзе праходзяць службу нашы землякі, прызваныя ў армію ў мінулым годзе. Гэта ўсе віды войскаў Узброеных Сіл Беларусі, органы пагранічнай службы, транспартныя войскі, унутраныя войскі Міністэрства ўнутраных спраў. Акрамя таго, больш за 15 землякоў у мінулым годзе адправіліся служыць па кантракце ў сілавыя структуры.
Арцём Кірута нагадаў, што, згодна з заканадаўствам Рэспублікі Беларусь, ваеннаслужачыя без вышэйшай адукацыі праходзяць тэрміновую ваенную службу на працягу 18 месяцаў. Навабранцаў з дыпломам ВНУ прызываюць на
12 месяцаў. Маладыя людзі, якія падчас вучобы ў вышэйшай навучальнай установе прайшлі адпаведную падрыхтоўку на ваенных кафедрах ці факультэтах па праграме падрыхтоўкі малодшых камандзіраў і паспяхова здалі залікі і экзамены па ваеннай справе, служаць усяго паўгода.
У Ляхавіцкім раёне наладжана і пастаянна ўдасканальваецца прафарыентацыйная работа з падрастаючым пакаленнем. І яна дае свой плён. У мінулым годзе ў розныя ваенныя навучальныя ўстановы паступілі 6 навучэнцаў устаноў адукацыі Ляхавіччыны.
Зараз у раёне праводзяцца падрых-тоўчыя мерапрыемствы да пачатку веснавой прызыўной кампаніі, якая пройдзе ў сакавіку – маі 2025 года.
Галіна КАНЬКО.
