Паклон табе, асенні ўзрост
У мінулую суботу ў гарадскім Доме культуры панавала шчырая, прыўзнята-шчымлівая атмасфера. На сустрэчу з мастацтвам, сябрамі, аднадумцамі і нават маладосцю прыйшлі людзі шаноўнага ўзросту і больш маладыя землякі, каб стаць удзельнікамі ўрачыстага мерапрыемства “Паклон табе, асенні ўзрост”. Так, па статусу яны – пажылыя людзі, якія і на словах і на справе заўсёды гатовы падзяліцца вопытам, даць канкрэтную і слушную параду і самі з гатоўнасцю бяруцца за любую справу. Але ў душы многія з іх застаюцца маладымі. Шматлікія выпрабаванні, радасць і гора, узлёты і падзенні былі ў кожнага, але не страчаны аптымізм, дабрыня і спагада, жаданне прыносіць карысць іншым і быць запа-трабаванымі.
Прыемна, што многія прадпрыемствы і арганізацыі ў першы дзень кастрычніка звярнуліся да сваіх былых работнікаў са словамі пашаны і падзякі, завіталі з віншаваннямі і падарункамі. Так, напрыклад, райпо ўжо не першы год знаходзіць магчымасць хоць крыху падтрымаць сваіх былых працаўнікоў, якія знаходзяцца на заслужаным адпачынку. І сёлета кожны з іх атрымаў прадуктовы набор.
На жаль, не ўсіх чакалі такія прыемныя сюрпрызы – гэта ўжо на сумленні былых калег.
Але, нягледзячы на гэта, у Дзень пажылых людзей было шмат нагод для добрага настрою.
З цікавасцю пазнаёміліся ўдзельнікі святочнай падзеі з выставай сапраўды таленавітых і багатых на выдумку і фантазію майстроў шаноўнага ўзросту. І яшчэ раз перакана-ліся, што ўзрост — творчасці не перашкода. Як можна не захапляцца вышыванымі карцінамі і эксклюзіўнымі вязанымі рэчамі, якія з задавальненнем надзене любая модніца? Аўтар гэтых вырабаў – жыхарка Русінавічаў Марыя Пісарава. Упрыгожванні з бісеру, вышыванкі і зробленыя ўласнымі рукамі народныя касцюмы прадставіла на суд гледачоў Ніна Алёхнік з Гай-нінца. Разнастайныя вышываныя вырабы – візітоўка таксама Соф’і Татарыновіч з Гайнінца, ляхавічанак Марыі Біза і Раісы Зелянеўскай. А Надзея Горка з вёскі Літва, як заўсёды, зачаравала саламянымі ўпрыгожваннямі, лялькамі і кветкамі.
Звяртаючыся да землякоў шаноўнага ўзросту, намеснік старшыні райвыканкама Уладзімір Крук падкрэсліў вялікую значнасць іх вопыту і пажадаў прысутным здароўя, натхнення, аптымізму і бадзёрасці. З прывітальным словам да ўдзельнікаў свята звярнуўся старшыня раённага савета ветэранаў Герой Сацыялістычнай Працы Генрых Траццяк.
Ад душы песнямі і танцамі віталі пажылых людзей самадзейныя выканаўцы, а райпо частавала пірагамі.
Галіна КАНЬКО