Медыцынская выразнасць. Медыкі Ляхавіцкага раёна адзначылі прафесійнае свята /фота/
Намеснік галоўнага ўрача ЦРБ Ірына Волкава, загадчык тэрапеўтычнага аддзялення Міхаіл Буйкевіч, галоўны бухгалтар Вольга Равяка (справа налева) удастоены Ганаровых грамат упраўлення аховы здароўя Брэсцкага аблвыканкама.
Конкурс кветкавых кампазіцый сярод медустаноў раёна – добрая і прыгожая традыцыя.
У мінулую пятніцу ў гарадскім Доме культуры медыкі раёна прымалі віншаванні з прафесійным святам. Старшыня райвыканкама Вячаслаў Сельмановіч падзякаваў ім за адданасць прафесіі, уручыў прывітальны адрас галоўнаму ўрачу райбальніцы Георгію Хлябовічу, граматы і падзячныя пісьмы райвыканкама і райсавета дэпутатаў спецыялістам цэнтральнай раённай бальніцы.
Шмат цёплых і добрых слоў пра калег сказаў Георгій Хлябовіч. Дарэчы, сёлета ляхавіцкія медыкі ў складзе абласной дэлегацыі пабывалі на ўрачыстасцях з нагоды свайго свята ў Палацы Рэспублікі. Удала дэбютавалі на абласным турыстычным злёце, вызначаюцца ў спартыўных спаборніцтвах. А правільны адпачынак спрыяе поспехам у працы. Шмат прафесійных здабыткаў, добрых перамен на карысць справы. Званне лепшага ўрача ў раёне па выніках мінулага года заслужыла педыятр Інэса Драздовіч.
Далучылася, як і заўсёды, да віншаванняў і медыцынская прафсаюзная пярвічка. А калі старшыня прафкама Васілій Гарбачоў заспяваў са сцэны, калегі апладыравалі стоячы!
У мінулым годзе ўстановы медыцыны раёна папоўніліся больш чым дваццаццю маладымі спецыялістамі. Яны штодзень імкнуцца праявіць сябе сапраўднымі прафесіяналамі. Наказы і сувеніры маладым калегам уручыла ад вялікай медыцынскай сям’і намеснік галоўнага ўрача Ірына Волкава, а яны, у сваю чаргу, дзякавалі за падтрымку, увагу і клопат.
Словы прызнання, павагі, захаплення гучалі ў адрас ветэранаў медыцыны, хто аддаў сістэме аховы здароўя нашага раёна дзесяцігоддзі, хто не глядзеў ніколі на гадзіннік, калі была патрэбна іх дапамога. Многія і сёння ў страі.
На ўрачыстым сходзе вызначаны і пераможцы конкурсу на лепшую кветкавую кампазіцыю. “Міласэрнасць” педыятрычнага аддзялення заваявала першае месца, “Яхта надзеі” хірургічнага – другое. Замкнула тройку лідараў кампазіцыя Крывошынскай участковай бальніцы з цудоўнымі пажаданнямі «хранічнага здароўя, гіпертанічнай зарплаты і прагрэсуючага шчасця».
Ліліся песні, гучалі сардэчныя пажаданні, у зале панавала атмасфера ўрачыстасці і свята, якую стваралі самадзейныя артысты раёна. Няхай прыемныя эмоцыі суправаджаюць нашых медыкаў і ў напружаныя будні, і ў звычайныя выхадныя дні.
Наталля ПЕРАПЕЧКА.
Фота Сяргея ВАРАНОВІЧА.
